Mobil versiya
Ağdam azadlığın, milli iradənin və genişmiqyaslı quruculuğun simvoluna çevrilib - Asif Əsgərov
Tarix: 18-11-2026 | Saat: 15:12
Bölmə:Manşet / Siyasət | çapa göndər

Ağdam azadlığın, milli iradənin və genişmiqyaslı quruculuğun simvoluna çevrilib

Ağdam Azərbaycanın qədim tarixə, zəngin mədəni irsə və böyük iqtisadi potensiala malik şəhərlərindən biridir. Qarabağın mühüm yaşayış məntəqələrindən olan Ağdam uzun illər ərzində bölgənin sosial-iqtisadi və mədəni həyatında özünəməxsus yer tutub. Artıq bu şəhər azadlığın, milli iradənin və genişmiqyaslı quruculuğun rəmzinə çevrilib.

1993-cü il iyulun 23-də Ağdamın işğal edilməsi rayonun həyatında faciəli bir dövrün başlanğıcı oldu. Ərazinin böyük hissəsi, o cümlədən şəhər mərkəzi və çoxsaylı yaşayış məntəqələri işğal altına düşdü. On minlərlə insan doğma yurdunu tərk etməyə məcbur oldu, minlərlə soydaşımız həyatını itirdi. Yaşayış evləri, məktəblər, xəstəxanalar, mədəniyyət müəssisələri, tarixi və dini abidələr dağıdıldı, şəhərin infrastrukturu tamamilə məhv edildi. İşğal nəticəsində törədilmiş dağıntılar beynəlxalq ictimaiyyətin diqqətinə çatdırılsa da, BMT Təhlükəsizlik Şurasının 1993-cü il iyulun 29-da qəbul etdiyi 853 saylı qətnamənin tələbləri uzun illər yerinə yetirilmədi.

Ağdamın işğal altında qaldığı illər ərzində xalqımız bu şəhərin azad olunacağına inamını itirmədi. Azərbaycan dövləti beynəlxalq hüquqa əsaslanan mövqeyini ardıcıl şəkildə müdafiə etdi, ordu quruculuğunu gücləndirdi, iqtisadi və siyasi potensialını artırdı. 2020-ci ilin Vətən müharibəsində qazanılan tarixi Zəfər ölkəmizin ərazi bütövlüyünün bərpası istiqamətində həlledici mərhələ oldu. Noyabrın 10-da imzalanmış üçtərəfli Bəyanata əsasən, noyabrın 20-də Ağdam rayonu Azərbaycana qaytarıldı. Ağdamın hərbi əməliyyatlar aparılmadan geri qaytarılması Azərbaycanın siyasi-diplomatik mövqeyinin və Vətən müharibəsində əldə etdiyi Qələbənin nəticəsi idi.

Prezident İlham Əliyevin Ağdamın gələcəyi ilə bağlı vurğuladığı fikirlər şəhərin yenidən qurulmasının əhəmiyyətini ifadə edir: “Dağılmış Ağdam şəhəri erməni vəhşiliyinin şahididir. Biz Ağdam şəhərini bərpa edəcəyik, bütün kəndləri bərpa edəcəyik. Heç kimdə bu haqda şübhə olmasın”. Ağdamın yenidən qurulması Azərbaycanın yalnız dağıdılmış şəhəri bərpa etmək deyil, onu əvvəlkindən daha müasir, daha dayanıqlı və daha əlverişli yaşayış məkanına çevirmək əzmini nümayiş etdirir.

Bu gün Ağdamda həyata keçirilən işlərin əsas fəlsəfəsi insan amilinə söykənir. İllərlə doğma evlərinin həsrəti ilə yaşayan insanların geri qayıtması, ailələrin yenidən öz yurdlarında məskunlaşması, uşaqların doğma şəhərlərində təhsil alması və insanların burada əmək fəaliyyəti ilə məşğul olması bərpa prosesinin ən mühüm nəticəsidir. Böyük Qayıdış Proqramı çərçivəsində Ağdam şəhərində və rayonun kəndlərində yaşayış məntəqələri mərhələli şəkildə yenidən qurulur. Kəngərli, Xıdırlı və Sarıcalı kəndlərində görülən işlər, yeni yaşayış evlərinin və sosial obyektlərin istifadəyə verilməsi bu siyasətin konkret təzahürüdür. Ağdama keçmiş məcburi köçkünlərin qayıdışına başlanması şəhərin həyatında yeni mərhələnin əsasını qoyub.

Ağdam şəhərinin Qarabağın iqtisadi həyatında aparıcı mövqeyə malik olması üçün istehsal, ticarət, xidmət və sahibkarlıq sahələrinin inkişafı da vacibdir. Bu baxımdan Ağdam Sənaye Parkının yaradılması strateji əhəmiyyət daşıyır. Postmüharibə dövründə yaradılan və 190 hektar ərazini əhatə edən sənaye parkı regionda yeni iqtisadi imkanların formalaşmasına xidmət edir. Müxtəlif istehsal sahələri üzrə müəssisələrin fəaliyyətə başlaması, investisiyaların cəlb edilməsi və yeni iş yerlərinin yaradılması Ağdamın iqtisadi potensialının bərpasına mühüm töhfə verir. Sənaye Parkı həm də keçmiş məcburi köçkünlərin məşğulluğunun təmin olunması, yerli sahibkarlığın təşviqi və rayonun iqtisadi müstəqilliyinin gücləndirilməsi baxımından əhəmiyyətlidir.

Ağdamın strateji mövqeyi onun nəqliyyat və logistika imkanlarını da ön plana çıxarır. Şəhərin ölkənin əsas nəqliyyat şəbəkəsinə inteqrasiyası, dəmir yolu və avtomobil yollarının bərpası Qarabağın iqtisadi əlaqələrinin genişlənməsinə şərait yaradır. Ağdam Dəmir Yolu və Avtovağzal Kompleksinin 2025-ci il mayın 10-da istifadəyə verilməsi bu istiqamətdə mühüm hadisədir. Müasir nəqliyyat infrastrukturu şəhərin digər bölgələrlə əlaqəsini asanlaşdırmaqla yanaşı, gələcəkdə yükdaşımaların, turizm səfərlərinin və iqtisadi əməkdaşlığın genişlənməsinə imkan verəcək. Ağdamın coğrafi mövqeyi onu Qarabağın mərkəzi hissəsində mühüm əlaqələndirici məkan kimi fərqləndirir.

Ağdamın yenidən qurulması Azərbaycanın beynəlxalq miqyasda nümayiş etdirdiyi bərpa və inkişaf modelinin də mühüm nümunəsidir. İşğal nəticəsində dağıdılmış şəhərin müasir standartlarla yenidən qurulması, iqtisadi fəaliyyətin təşviqi, sosial infrastrukturun yaradılması və əhalinin mərhələli şəkildə geri qaytarılması genişmiqyaslı dövlət proqramının tərkib hissəsidir. Bu proses Azərbaycanın öz ərazi bütövlüyünü bərpa etdikdən sonra qarşıya qoyduğu əsas məqsədlərdən birini – azad edilmiş torpaqlarda təhlükəsiz, firavan və davamlı həyatın təmin olunmasını nümayiş etdirir.

20 Noyabr – Ağdam Şəhəri Günü işğalın sona çatmasını, tarixi ədalətin bərpasını, doğma yurda qayıdış ümidinin gerçəyə çevrilməsini və böyük quruculuq mərhələsinin başlanmasını ifadə edir. Ağdamın yenidən həyata qayıtması Azərbaycan dövlətinin gücünü, xalqımızın birliyini və milli iradəsini nümayiş etdirir. Artıq təməlləri qoyulan yeni Ağdam gələcəkdə Qarabağın ən mühüm iqtisadi, sosial və mədəni mərkəzlərindən biri olacaq. Tarixin ağır sınaqlarından keçən şəhər indi özünün yeni inkişaf salnaməsini yazır – bu salnamənin əsas məzmununu isə Zəfər, qayıdış və quruculuq təşkil edir.

Asif Əsgərov
Milli Məclisin deputatı




Məlumatlanmaq üçün Facebook səhifəmizi


Xəbəri paylaş


Digər xəbərlər



Xəbərə şərh yaz
Ad və soyad:*
E-Mail:
Şərhiniz:
Kodu yazın: *
yenilə, əgər kod görünmürsə
18-11-2026