YAP – tarixi məsuliyyətin, milli iradənin və dövlətçilik yolunun daşıyıcısı

YAP – tarixi məsuliyyətin, milli iradənin və dövlətçilik yolunun daşıyıcısı
Tarix: 20-11-2025 | Saat: 11:13
Bölmə:Siyasət | çapa göndər

Şirift ölçüsü:

1992-ci il 21 noyabr tarixi Azərbaycan siyasi yaddaşına xalqın taleyini dəyişən gün kimi həkk olunmuşdur. Həmin gün keçirilən Yeni Azərbaycan Partiyasının təsis konfransı ölkəni dərin böhranlardan xilas etməyə qadir olan yeni siyasi mərhələnin başlanğıcı oldu. O illərdə Azərbaycan ağır sınaqlarla üz-üzə idi; dövlət institutları zəifləyir, sosial sabitlik pozulur, xalqın ümidi tükənirdi. Müstəqil dövlətin yenicə qurulduğu bir vaxtda idarəetmədəki xaos ölkə üçün ciddi təhlükələr yaradırdı. Belə tarixi anda xalqın xilası üçün Heydər Əliyev kimi müdrik liderin yenidən siyasətə qayıdışına böyük ehtiyac vardı. Məhz bu ehtiyac 91 məşhur ziyalının çağırışını doğurdu və bu çağırış YAP-ın yaranmasının ilk qığılcımı oldu. Təsis konfransı həmin qığılcımın böyük bir siyasi hərəkatına çevrildiyi məkan idi.
Konfransda qəbul olunan qərarlar Azərbaycanın taleyini dəyişəcək qədər əhəmiyyətli idi. Burada əsas məqsəd ölkəni uçurumdan xilas etmək, dövlətçiliyi qorumaq və gələcək inkişafın ideoloji əsaslarını müəyyən etmək idi. Heydər Əliyev bu missiyanı böyük məsuliyyətlə öz üzərinə götürdü. Onun “YAP dünənin, bu günün və gələcəyin partiyasıdır” kəlamı partiyanın mənəvi və siyasi missiyasını dəqiq ifadə edirdi. Bu fikir YAP-ın yalnız yaranma dövrünün deyil, gələcək nəsillərin də partiyası olduğunu göstərirdi. Partiya həm tarixi təcrübəyə, həm də gələcəyi görmək bacarığına əsaslanırdı.
YAP-ın yaranması ilə cəmiyyətdə siyasi düşüncə yeni istiqamət aldı. İnsanlarda ümid və birlik duyğusu yenidən canlandı. Partiya qısa müddətdə genişlənərək ölkənin hər bölgəsində öz dayaqlarını formalaşdırdı. Xalq Heydər Əliyevin müdrikliyinə güvəndiyi üçün YAP-ın ətrafında sıx birləşdi. Partiyanın ideoloji xətti Azərbaycançılıq, dövlətçilik, milli birlik və modern inkişaf prinsiplərinə əsaslanırdı. Bu dəyərlər sonradan bütün dövlət idarəçiliyinin əsasını təşkil etdi.
Heydər Əliyevin 1993-cü ildə hakimiyyətə qayıdışı ilə YAP ölkənin siyasi və iqtisadi inkişafının aparıcı qüvvəsinə çevrildi. Həmin vaxtdan Azərbaycan sabitlik, nizam və inkişaf dövrünə qədəm qoydu. Dövlət idarəçiliyində sistemli yanaşma, iqtisadiyyatın bərpası, ordu quruculuğu və beynəlxalq siyasətdə balanslaşdırılmış mövqe ölkənin inkişafına mühüm təkan verdi. Bu proseslərdə YAP həm siyasi dayağı, həm də real fəaliyyət mexanizmi ilə ön sırada dayanırdı. Partiya cəmiyyətdə maarifləndirmə, təşkilatlanma və milli həmrəyliyin gücləndirilməsi istiqamətində mühüm missiyanı icra edirdi.
1990-cı illərin sonuna doğru Azərbaycan artıq regional siyasətdə söz sahibi olan bir dövlət kimi tanınırdı. Enerji layihələri ölkənin iqtisadi müstəqilliyini gücləndirdi. Bu nailiyyətlər Heydər Əliyevin uzaqgörən strategiyasının nəticəsi idi və həmin strategiyanın siyasi dayağı YAP idi. Partiya həmçinin ictimai-sosial sahədə də geniş fəaliyyət göstərirdi. Əhalinin həyat səviyyəsinin yaxşılaşdırılması, sosial təminat sisteminin gücləndirilməsi, gənclərin inkişafı üçün yaradılan imkanlar xalqın partiyaya olan etimadını daha da artırırdı.
2003-cü ildə İlham Əliyevin Prezident seçilməsi ilə Azərbaycan inkişafın yeni mərhələsinə daxil oldu. Bu mərhələdə YAP Ulu Öndərin siyasi xəttinin ardıcıl şəkildə davam etdirilməsinə mühüm töhfə verdi. Prezident İlham Əliyev modern idarəetmə, iqtisadi inkişaf, diplomatik fəaliyyət və ordu quruculuğu sahələrində çoxsaylı nailiyyətlər qazanaraq YAP-ın ideologiyasını daha da gücləndirdi. Xalq-iqtidar birliyinin möhkəmlənməsi partiyanın əsas siyasi dayaqlarından biri oldu.
Azərbaycan dünyada etibarlı tərəfdaş, regionda lider dövlət, Cənubi Qafqazda isə sülh və əməkdaşlıq təşəbbüslərinin müəllifi kimi tanınmağa başladı. Bu inkişaf xəttinin arxasında YAP-ın güclü siyasi təşkilatlanması, düzgün hədəf seçimi və xalqla sıx təması dayanırdı. Partiya həmçinin cəmiyyətin yeniləşməsinə, modern düşüncənin formalaşmasına və gənclərin siyasi fəallığının artmasına böyük dəstək verdi. Gənclərin partiya sıralarında artması gələcəyə inamın, YAP-ın ideoloji dayaqlarının möhkəmliyinin göstəricisi idi.
Azərbaycanın ərazi bütövlüyünün bərpasında qazanılan tarixi Zəfər də məhz bu siyasi xəttin davamı və dövlətin gücünün nəticəsi idi. Bu dövrdə YAP xalqın birliyinin, ordunun gücünün və dövlətin iradəsinin siyasi təmsilçisi kimi çıxış etdi. Prezident İlham Əliyevin rəhbərliyi ilə həyata keçirilən siyasətin uğuru YAP-ın güclü təşkilatlanması və xalq dəstəyi ilə daha da möhkəmləndi. Müharibədən sonrakı dövrdə quruculuq, bərpa və inkişaf proseslərində də partiya fəal şəkildə iştirak edir.
Bu gün YAP ölkənin modern inkişaf strategiyasının aparıcı siyasi qüvvəsi olaraq fəaliyyət göstərir. Partiya həm ideoloji, həm siyasi, həm də təşkilati baxımdan güclü bir struktura çevrilmişdir. Dövlətçilik, milli birlik, iqtisadi tərəqqi və sosial rifah YAP-ın fəaliyyətinin əsas istiqamətləridir. Bu istiqamətlər həm keçmişə, həm bu günə, həm də gələcəyə hesablanan tarixi konsepsiyanın tərkib hissəsidir. Ulu Öndərin “YAP dünənin, bu günün və gələcəyin partiyasıdır” kəlamı bu gün də öz aktuallığını qoruyur və partiyanın fəaliyyətinə yön verən əsas ideya olaraq qalır.
YAP-ın təsis konfransından keçən illər sübut etdi ki, xalqın iradəsinə söykənən siyasi güc zamanın sınaqlarından keçərək daha da möhkəmlənir. Azərbaycan bu gün güclü, təhlükəsiz və inkişaf edən bir dövlətdirsə, bunun arxasında Ulu Öndərin yaratdığı siyasi məktəb və həmin məktəbin davamı olan YAP dayanır. Bu partiya yalnız keçmişi deyil, həm də gələcəyi uğurla formalaşdıran milli siyasi platformadır. Bu gün YAP-ın fəaliyyəti ölkənin sabitliyinin, inkişafının və dövlətçiliyinin güclənməsinin mühüm təminatçısı kimi davam edir.

Zaur Mehdiyev,
YAP Gədəbəy rayon təşkilatının sədr müavini.

Ad və soyad:*
E-Mail:
Şərhiniz:
Kodu yazın: *