Azərbaycan-Türkiyə-Pakistan: mənəvi-siyasi birlikdən geostrateji güc mərkəzinə

Azərbaycan-Türkiyə-Pakistan: mənəvi-siyasi birlikdən geostrateji güc mərkəzinə - DEPUTAT
Tarix: 30-05-2025 | Saat: 18:02
Bölmə:Manşet / Siyasət | çapa göndər

Şirift ölçüsü:

28 May – Müstəqillik Günü münasibətilə Laçın şəhərində keçirilən təntənəli tədbirlər üç qardaş ölkə - Azərbaycan, Türkiyə və Pakistan arasında həmrəylik, dostluq və strateji tərəfdaşlığın parlaq təzahürü kimi dünyanın diqqət mərkəzində oldu.

Prezident İlham Əliyevin Laçında səsləndirdiyi fikirlər bu mühüm səfərin siyasi və mənəvi əhəmiyyətini bir daha aydın şəkildə ortaya qoyur. Azərbaycanın ərazi bütövlüyünün bərpası şəraitində müstəqilliyin bu torpaqlarda yüksək səviyyədə qeyd olunması dövlətçilik iradəsinin və tarixi ədalətin təntənəsidir. Dövlətimizin başçısı çıxışında həm regional geosiyasi reallıqlara, həm də ölkənin daxili və xarici siyasət gündəliyində mühüm yer tutan məsələlərə qətiyyətli və prinsipial mövqedən yanaşaraq milli maraqlara əsaslanan mesajlar verdi.

Azərbaycan–Türkiyə–Pakistan liderlərinin Zirvə görüşü həmrəylik və qarşılıqlı etimada əsaslanan üçtərəfli münasibətlərin keyfiyyətcə yeni mərhələyə qədəm qoyduğunu göstərir. Bu formatda yüksək səviyyəli görüşün məhz Laçında keçirilməsi Azərbaycanın suverenliyinə göstərilən hörmətin ifadəsidir. Zirvə görüşündə səslənən mesajlar bir daha nümayiş etdirir ki, üç dost ölkə ortaq tarixə, mədəniyyətə və dəyərlərə söykənən münasibətlərini daha da gücləndirmək əzmindədir. Dövlətimizin başçısı bildirib ki, Azərbaycan, Türkiyə və Pakistan - üç qardaş ölkə əməkdaşlığı ildən-ilə, gündən-günə gücləndirirlər: “Biz yaxşı günlərdə də, ağır günlərdə də hər zaman bir-birimizin yanındayıq, həmrəylik, dəstək göstəririk. Bu gün ikinci üçtərəfli Zirvə görüşündə bir daha bizim strateji əməkdaşlığımız təsdiqləndi. İşğaldan azad edilmiş Laçında, Şərqi Zəngəzurda iki qardaş ölkənin liderlərinin iştirakı ilə keçirilən bugünkü mərasim Azərbaycan-Türkiyə-Pakistan birliyinin, qardaşlığının növbəti təzahürüdür”.

Azərbaycan uzun və çətin bir yol keçərək, ədalətsizliyə və ikili standartlara sinə gərərək öz gücünə arxalanmış, beləliklə torpaqlarını işğaldan azad etməyə müvəffəq olmuşdur. Ölkəmizin iqtisadi potensialı, hərbi qüdrəti və milli iradəsi bu tarixi qələbəni təmin etmişdir. Bu gün isə artıq Böyük Qayıdışın təntənəsi yaşanır, azad edilmiş ərazilərdə həyat yenidən canlanır.

Ölkəmizin haqq işinə dost və qardaş dövlətlərin verdiyi dəstək hər zaman xüsusi əhəmiyyət kəsb etmişdir. Vətən müharibəsi zamanı Türkiyə və Pakistanın nümayiş etdirdiyi qətiyyətli mövqe, Azərbaycanın ərazi bütövlüyü və suveren hüquqlarının qorunması istiqamətində səsləndirilən açıq və prinsipial bəyanatlar beynəlxalq ictimaiyyətə mühüm siyasi mesaj olmuşdur. Postmünaqişə dövründə də bu dost dövlətlərin ölkəmizin yanında yer alması, birgə layihələr və siyasi dialoqun dərinləşməsi dostluğun və qarşılıqlı inamın davamlı əsaslar üzərində qurulduğunu təsdiqləyir.

Prezident İlham Əliyevin çıxışında diqqət çəkən əsas məqamlardan biri gələcəyə yönələn strateji çağırış idi. Bu amillər həm Azərbaycanın milli maraqları, həm də regional əməkdaşlıq və qlobal tərəfdaşlıq çərçivəsindəki məqsədlərlə səsləşir. Xüsusilə Azərbaycan, Türkiyə və Pakistan arasında formalaşan üçtərəfli əməkdaşlıq modeli artıq regional sabitlik və rifahın təmin olunmasında dayanıqlı və etibarlı bir platformaya çevrilib. Artıq bu tərəfdaşlıq iqtisadiyyat, nəqliyyat, enerji və müdafiə kimi mühüm sahələri əhatə edən konkret layihələrlə genişlənməkdədir.

Laçında keçirilən Zirvə görüşü siyasi iradənin, qardaşlığın və güclü tərəfdaşlığın parlaq təzahürüdür. Azərbaycan öz tarixi missiyasını qətiyyətlə həyata keçirir, dost və tərəfdaş ölkələrlə birlikdə sabit və ədalətli gələcək qurmaq yolunda inamla irəliləyir. Laçında nümayiş olunan birlik həm də regionda yeni geosiyasi reallıqların və güvən əsaslı əməkdaşlığın təməlini möhkəmləndirir. Bu cür platformalar, eyni zamanda, dövlətlərarası münasibətlərin daha da dərinləşməsinə və uzunmüddətli strateji məqsədlərin gerçəkləşməsinə xidmət edir. Dövlətimizin başçısının qeyd etdiyi kimi, artıq dörd ildən çoxdur ki, biz müzəffər xalq və dövlət kimi yaşayırıq və əbədiyyətə qədər yaşayacağıq: “Bu gün əziz qardaşlarımın - Türkiyə Prezidentinin və Pakistanın Baş nazirinin bizimlə bərabər bu bayram tədbirlərində iştirakı, bizə göstərilən dəstək və həmrəylik artıq tamamilə yeni dünya miqyasında reallıqlar yaradır. Bizim gücümüz birliyimizdədir. Bu gün birliyimizi üçtərəfli formatda bir daha təsdiqlədik. Bu gün bayram konsertində səslənəcək mahnılar bir daha bizim birliyimizi, nə qədər zəngin mədəniyyətə malik olmağımızı göstərəcək”.

Azərbaycan, Türkiyə və Pakistan bu gün parlaq gələcəyə doğru inamla addımlayırlar. Onların nümayiş etdirdiyi ortaq dəyərlər və strateji baxış gələcək nəsillərin inkişaf yolunu müəyyən edən əsas istiqamətləri formalaşdırır. Bu möhkəm həmrəylik və çoxşaxəli tərəfdaşlıq modeli regional sülhün, rifahın və qarşılıqlı inamın dayanıqlı təminatçısına çevrilib.

Asif Əsgərov
Milli Məclisin deputatı

Ad və soyad:*
E-Mail:
Şərhiniz:
Kodu yazın: *