Qurban bayramı Azərbaycanda tolerantlığın təntənəsinə çevrilib

Qurban bayramı Azərbaycanda tolerantlığın təntənəsinə çevrilib
Tarix: 16-07-2021 | Saat: 09:50
Bölmə:Seçki 2024 | çapa göndər

Şirift ölçüsü:

Azərbaycanda bir sıra milli və dini bayramlar var ki, həmin bayramlar xalqın milli-mənəvi keyfiyyətlərini təcəssüm etdirir. Belə bayramlardan biri də Qurban bayramıdır ki, ölkəmiz müstəqillik əldə etdikdən sonra daha da geniş miqyasda keçirilməsi təmin edilib. Daha dəqiq, Azərbaycan müstəqilliyini bərpa etdikdən sonra bütün dünya müsəlmanlarının həmrəylik və qardaşlıq rəmzi olan Qurban bayramının ölkəmizdə dövlət səviyyəsində qeyd olunması xalqla dövlətin birliyini, Azərbaycan xalqının öz milli və dini ənənələrinə sadiq olduğunu bir növ dünyaya nümayiş etdirir. İslamın humanizm, bərabərlik və qardaşlıq prinsiplərinə sədaqətini həmişə nümayiş etdirmiş Azərbaycan xalqı əsrlər boyu, hətta ən mürəkkəb dövrlərdə belə Qurban bayramını özünün əziz günlərindən biri kimi qeyd edib.

Azərbaycanın dövlət müstəqilliyinin bərpası ilə bu bayramın müsəlman əhali tərəfindən layiqincə qeyd edilməsi üçün əlverişli şərait yaranıb. Bu bayram Azərbaycanda tolerantlığın təntənəsinə çevrilib. Müxtəlif dini konfessiyaların nümayəndələri də bu bayram günündə vahid Azərbaycan xalqının birlik və qardaşlığını nümayiş etdirir, müsəlman dostlarını təbrik edirlər. Etiraf edək ki, bu, Azərbaycan xalqının mənəvi birliyinin ifadəsidir.
Yüz illərdir ki, ayrı-ayrı xalqların və dinlərin mənsublarının mehriban ailə kimi yaşadıqları Azərbaycanda qarşılıqlı hörmət və etimada əsaslanan nümunəvi birgəyaşayış mühiti mövcuddur və etnik-mədəni müxtəliflik qorunub saxlanılır. Hər il ölkəmizdə rəsmi şəkildə qeyd edilən dini bayramlar mütərəqqi milli-mənəvi dəyərlərin, sosial yardımlaşmanın və xeyirxahlıq duyğularının təntənəsinə çevrilir, cəmiyyətimizdə birlik və bərabərlik ovqatını daha da gücləndirir. Bu cəhətlər Azərbaycanı dünyada tolerantlığın və multikulturalizmin nümunəvi məkanlarından biri kimi tanıdır. Bu baxımdan, Qurban bayramı Azərbaycanda tolerantlığın təntənəsinə çevrilib.

Qurban bayramında müsəlmanlar Allah yolunda hər bir fədakarlığa hazır olduqlarını nümayiş etdirdikləri kimi, Vətən müharibəsində də bütün Azərbaycan xalqı Müzəffər Ali Baş Komandan İlham Əliyevin rəhbərliyi altında Vətən naminə canlarından keçməyə belə hazır olduqlarını göstərdilər. Bu, Azərbaycan xalqının böyüklüyünün və öz ali dəyərlərinə sadiqliyinin ən parlaq ifadəsi idi. Öz dərin tarixi kökünə, milli və dini dəyərlərinə sidq-ürəkdən bağlı olan Azərbaycan anası, Azərbaycan atası öz övladının qanını və canını Vətən yolunda əsirgəmədi. Bu gün Azərbaycanı ərazi bütövlüyünə qovuşduran, ay-ulduzlu bayrağı əzəli torpaqlarımızda dalğalandıran da xalqımızın öz yaddaşında, gündəlik həyatında qoruyub saxladığı bu dəyərlərdir. Qurban bayramı Allah yolunda fədakarlığın, İkinci Qarabağ müharibəsi isə Vətən yolunda fədakarlığın təntənəsidir. Vətən müharibəsində qazanılan Zəfər xalqımızın qurbanlarının və dualarının qəbul olunduğunun göstəricisidir.

Adil Qarayev,
YAP Göygöl rayon təşkilatının Xəqani kənd bələdiyyəsi ərazi ilk partiya təşkilatının sədri
aia.az

Ad və soyad:*
E-Mail:
Şərhiniz:
Kodu yazın: *