AZ RU Mobil versiya
Ermənilərin Qarabağda törətdiyi vandallıq aktları Xorvatiya mətbuatında
Tarix: 01-03-2021 | Saat: 17:32
Bölmə:Siyasət / Seçilənlər-5 | çapa göndər

Ermənilərin Qarabağda törətdiyi vandallıq aktları Xorvatiya mətbuatında

Milli Məclisin deputatı, Azərbaycan-Xorvatiya Parlamentlərarası İşçi Qrupun rəhbəri Könül Nurullayevanın Xorvatiya mətbuatında “Qarabağda 30 illik işğalın dərin izləri” başlıqlı məqaləsi dərc olunub. Məqalədə qeyd olunur ki, ötən il 44 günlük Vətən Müharibəsi zamanı Azərbaycan tarixi ərazilərini işğaldan azad etdi. Bu gün dünya 28 ildir işğal altında olan Qarabağın dəhşətli görüntüsü ilə tanış olur. “Azərbaycan Respublikasının Prezidenti İlham Əliyevin tapşırığına əsasən, Azərbaycandakı səfirlər, hərbi attaşelər, beynəlxalq təşkilatların baş nümayəndələri və xarici jurnalistlər üçün azad edilmiş ərazilərə mütəmadi səfərlər təşkil olunur. Belə səfərlərdən biri bu günlərdə Cəbrayıl və Zəngilan rayonlarına təşkil olundu. Diplomatlar 30 ilə yaxın işğal altında qalan Azərbaycan torpaqlarında törədilən vəhşiliklərin, cinayət izlərinin əyani şəkildə şahidi oldular”.

Müəllif Xorvatiyanın Azərbaycandakı səfiri cənab Branko Zebiçin dağıdılmış Cəbrayıl şəhərindəki mənzərə ilə bağlı təəssüratlarını xatırladıb: “Cənab Zebiç bu dəhşətli səhnənin 30 il əvvəl Xorvatiyadakı mənzərə ilə oxşarlıq təşkil etdiyini vurğulayıb. Səfir digər diplomatik nümayəndəliklərin təmsilçiləri ilə birlikdə bölgədə sülh, əməkdaşlıq və inkişaf üzərində davamlı iş aparmağın vacibliyini qeyd edib. Vaxtı ilə on minlərlə insanın yaşadığı, çiçəklənən ərazilər olan Qarabağ şəhərləri, bütün infrastrukturun kütləvi şəkildə məhv olması səbəbindən bu gün ruhlar şəhərinə çevrilib. Təsadüfi deyil ki, azad olunduqdan sonra səfər zamanı xarici jurnalistlər tamamilə dağıdılmış Ağdam şəhərini “Qafqazın Xirosiması” adlandırıblar. Eyni sözlər digər şəhərlərə də aid edilə bilər. Ağdam kimi Zəngilan, Cəbrayıl və Qubadlı da tamamilə dağıdılıb”.

K. Nurullayeva həmçinin qeyd edib ki, bütün dağıntılar Birinci Qarabağ müharibəsi başa çatdıqdan sonra törədilib. Əsas məqsəd Azərbaycanın mədəni irsinin izlərini məhv etmək, azərbaycanlıların bu ərazilərə qayıtmalarına imkan verməmək olub.

Məqalədə Qarabağın tarixi Azərbaycan torpağı olması konkret faktlarla əsaslandırılıb: “Qarabağ tarixən azərbaycanlılara məxsus olub. 200 il əvvəl Qarabağda ümumiyyətlə, ermənilər olmayıb. Qarabağ xanının Rus imperiyası ilə 1805-ci il mayın 14-də imzaladığı Kürəkçay müqaviləsində etnik ermənilər barədə heç nə deyilmir. Coğrafi ərazinin adı da Azərbaycan sözüdür – “Qara” (qara həm rəng, həm də qədim türk mənbələrində böyük mənasını verir) və “bağ” sözlərinin birləşməsindən yaranıb. Etnik ermənilər bu regiona onun dini və etnik tərkibini dəyişdirmək məqsədilə Şərqi Anadoludan və İrandan çar Rusiyası tərəfindən gətirilib”.

Qarabağda ermənilərin törətdiyi mədəni terrora da toxunan K. Nurullayeva yazır ki, burada bütün məscidlər dağıdılıb, 128 qədim alban kilsəsi saxtalaşdırılıb: “Təəssüf ki, bir neçə beynəlxalq təşkilatın araşdırma missiyası zamanı verilən hesabatlar bu həqiqətləri tam əhatə etməyib. Azərbaycan isə tolerantlıq nümunəsi göstərərək dini ayinləri yerinə yetirmək üçün Alban-udi icmasının nümayəndələrinin azad edilmiş ərazilərə səfərlərini təşkil etdi. 28 il sonra Alban-Udi icması Kəlbəcər və Laçındakı tarixi ibadətgahlarında yenidən dua edə bildilər”.

Məqalədə həmçinin vurğulanır ki, azad olunmuş ərazilərdə qeydə alınan faktlar dünya mətbuatında da olduğu kimi işıqlandırılmalı, bu ərazilərə səfər edəcək faktaraşdırıcı missiyalar obyektiv hesabatlar hazırlamalıdır.

Linkə keçid edərək məqalə ilə ətraflı tanış ola bilərsiniz: Duboki tragovi 30 godina okupacije u Karabahu



Məlumatlanmaq üçün Facebook səhifəmizi

8230 dəfə oxunub.


Digər xəbərlər



Xəbərə şərh yaz
Ad və soyad:*
E-Mail:
Şərhiniz:
Kodu yazın: *
yenilə, əgər kod görünmürsə
19-04-2021
16-04-2021