Mobil versiya
Natiq Əliyevin vəfatı ilə bağlı nekroloq imzalandı
Tarix: 09-06-2017 | Saat: 18:09
Bölmə:Gündəm / Karusel | çapa göndər

Natiq Əliyevin vəfatı ilə bağlı nekroloq imzalandı



Azərbaycanın energetika naziri Natiq Əliyevin vəfatı ilə əlaqədar nekroloq imzalanıb.

AİA.az xəbər verir ki, nekroloqu Prezident İlham Əliyev, birinci xanım Mehriban Əliyeva, Artur Rasizadə, Oqtay Əsədov, Ramiz Mehdiyev, Yaqub Eyyubov, Valeh Ələsgərov, Hacıbala Abutalıbov, Akif Əlizadə, Şahin Mustafayev, Rövnəq Abdullayev, Xoşbəxt Yusifzadə, Etibar Pirverdiyev, Balababa Rzayev, Natiq Abbasov imzalayıblar.


Başsağlığında deyilir:

"Azərbaycan ictimaiyyətinə ağır itki üz vermişdir. Azərbaycan Respublikasının sənaye və energetika naziri Natiq Ağaəmi oğlu Əliyev 2017-ci il iyunun 9-da ömrünün 70-ci ilində vəfat etmişdir.
Natiq Əliyev 1947-ci il noyabr ayının 23-də Bakı şəhərində anadan olmuşdur. Orta məktəbi bitirdikdən sonra o, 1965¬–1970-ci illərdə Azərbaycan Neft və Kimya İnstitutunda dağ mühəndis-geoloqu ixtisası üzrə ali təhsil almışdır. Natiq Əliyev 1971–1974-cü illərdə Azərbaycan Respublikası Elmlər Akademiyasının Geologiya İnstitutunun aspiranturasında oxumuş və 1975-ci ildə geologiya-mineralogiya elmləri namizədi, 2008-ci ildə isə iqtisad elmləri doktoru alimlik dərəcələrini almışdır.
Əmək fəaliyyətinə 1970-ci ildən etibarən “Xəzərdənizneftqazsənaye” İstehsalat Birliyinin “Azərdənizneftkəşfiyyat” trestində texnik-geoloq kimi başlayan Natiq Əliyev 1974–1976-cı illərdə Azərbaycan Respublikası Elmlər Akademiyasının Geologiya İnstitutunun kiçik elmi işçisi, 1976–1979-cu illərdə Elmlər Akademiyası “Xəzər” elmi mərkəzinin kiçik elmi işçisi və baş elmi işçisi olmuşdur. O, 1979-cu ildə “Xəzərdənizneftqazsənaye” İstehsalat Birliyinin Kompleks dəniz geoloji kəşfiyyat kontorunda geologiya şöbəsinin rəisi təyin olunaraq 1984-cü ilədək bu vəzifədə çalışmış, 1984–1991-ci illərdə isə Azərbaycan Kommunist Partiyası Mərkəzi Komitəsinin neft və kimya sənayesi şöbəsində təlimatçı və bölmə müdiri işləmişdir.
1993-cü ildə Azərbaycan Respublikası Dövlət Neft Şirkətinin prezidenti təyin edilən Natiq Əliyev 2005-ci ilədək həmin vəzifəni tutmuş, 2005–2013-cü illərdə Azərbaycan Respublikasının sənaye və energetika naziri, 2013-cü ildən ömrünün sonunadək isə energetika naziri olmuşdur.
Natiq Əliyev uzun illər Azərbaycanın milli maraqlarının qorunması üçün bilik və bacarığını əsirgəməyərək, özünün yüksək peşəkarlığı və təşəbbüskarlığı sayəsində ölkənin enerji təhlükəsizliyinin təmin olunmasına yönəlmiş dövlət proqramları və inkişaf konsepsiyalarının hazırlanıb müvəffəqiyyətlə gerçəkləşdirilməsində təqdirəlayiq fəaliyyət göstərmişdir. Respublikamızın 1994-cü ilin sentyabrında dünyanın transmilli şirkətləri ilə imzaladığı “Əsrin müqaviləsi” ilə başlanan yeni neft strategiyasının uğurla həyata keçirilməsində, neft-qaz sazişlərinin imzalanmasında, Bakı–Supsa, Bakı–Tbilisi–Ceyhan, Bakı–Tbilisi–Ərzurum kimi qlobal layihələrin reallığa çevrilməsində və bütövlükdə Azərbaycanın enerji sahəsində tarixi nailiyyətlər qazanmasında Natiq Əliyevin özünəməxsus xidmətləri vardır. O, qlobal enerji təhlükəsizliyi layihəsi sayılan “Cənub Qaz Dəhlizi” üzrə əməkdaşlıq münasibətlərinin qurulması və layihənin yerinə yetirilməsi işinə layiqli töhfələr vermişdir.
Natiq Əliyevin tədqiqatçı-alim olaraq Xəzər dənizində neft-qaz yataqlarının axtarışı və kəşfiyyatına, eləcə də enerji sektorunun ayrı-ayrı məsələlərinin öyrənilməsinə dair 100-dən artıq sanballı elmi araşdırması mütəxəssislər tərəfindən rəğbətlə qarşılanmışdır.
Beynəlxalq enerji siyasəti sahəsində tanınmış mütəxəssislərdən olan Natiq Əliyevin Azərbaycanın sosial-iqtisadi yüksəlişi və enerji təhlükəsizliyinin təmin olunmasında, enerji resurslarından istifadənin səmərəliliyinin artırılması işlərinin əlaqələndirilməsində, neft sənayesinin və energetikanın inkişafında səmərəli xidmətləri yüksək qiymətləndirilmişdir. O, bir sıra xarici ölkələrin mötəbər mükafatlarını almış, müstəqil Azərbaycan Respublikasının ali dövlət təltiflərindən “Şöhrət” ordeninə layiq görülmüşdür.
Tanınmış ictimai-siyasi xadim, Əməkdar mühəndis, bacarıqlı təşkilatçı və təvazökar insan Natiq Əliyevin xatirəsi onu tanıyanların qəlbində həmişə yaşayacaqdır.
Allah rəhmət eləsin!".

Mərhumun cənazəsi vidalaşmaq üçün 2017-ci il iyunun 10-da saat 12:00-dan 14:00-dək Şəhriyar adına Bakı Mədəniyyət Mərkəzinin binasında (Rəşid Behbudov küçəsi, 3) qoyulacaq.
Dəfn mərasimi Fəxri xiyabanda keçiriləcək.

AİA.az



Məlumatlanmaq üçün Facebook səhifəmizi


Xəbəri paylaş


Digər xəbərlər



Xəbərə şərh yaz
Ad və soyad:*
E-Mail:
Şərhiniz:
Kodu yazın: *
yenilə, əgər kod görünmürsə
29-03-2024