Ağcabədidə xeyli miqdarda saxta əsginas qanunsuz dövriyyədən çıxarılıb
24-12-2018, 14:16. Yazar: sevinc1
Polis əməkdaşları tərəfindən Ağcabədi rayonunda xeyli miqdarda saxta əsginas aşkar edilərək qanunsuz dövriyyədən çıxarılıb.
DİN Mətbuat Xidmətindən aia.az-a verilən məlumata görə, Ağcabədi Rayon Polis Şöbəsinə müraciət edən 4 mağaza sahibi dekabrın 23-də mağazalarında alış-veriş edən 2 nəfərin onlara müvafiq olaraq 3 ədəd 20 manatlıq və 1 ədəd 100 manatlıq əsginaslar verdiklərini, sonradan həmin pulların saxta olduğunu aşkar etdiklərini bildiriblər. Həmin əsginaslar polis əməkdaşlarına təqdim olunub.
Müraciətlə əlaqədar dərhal müvafiq araşdırmalar aparılıb. Keçirilmiş əməliyyat-axtarış tədbirləri nəticəsində saxta pulları verməkdə şübhəli bilinən rayon sakinləri Mehdi Mehdizadə və Təhminə Nəzərova qısa müddətdə müəyyən edilərək polis əməkdaşları tərəfindən saxlanılıblar. Onlardan əlavə olaraq 2 ədəd 100 manatlıq, 1 ədəd 50 manatlıq və 2 ədəd 20 manatlıq saxta əsginaslar aşkar edilib.
Araşdırmalarla onların saxta əsginasları T.Nəzərovanın atası Firəddindən aldıqları müəyyən edilib.
Görülmüş tədbirlərlə əvvəllər məhkum olunmuş Firəddin Nəzərov da saxlanılıb. Əməliyyat-axtarış tədbirləri ilə onun yaşadığı evdən 21 ədəd 100 manatlıq, 29 ədəd 20 manatlıq, 11 ədəd 10 manatlıq, 62 ədəd 5 manatlıq və 37 ədəd 1 manatlıq saxta əsginaslar aşkar edilərək polis əməkdaşları tərəfindən götürülüb.
Faktla bağlı Cinayət Məcəlləsinin 204-cü (Saxta pul və ya qiymətli kağızlar hazırlama, əldə etmə və ya satma) maddəsi ilə cinayət işi başlanılıb.
aia.az
Geri dön