Ulu Öndər Heydər Əliyevin anım günü ilə əlaqədar dekabrın 12-də Yeni Azərbaycan Partiyasının (YAP) Laçın rayon təşkilatında dəyirmi masa keçirilib
12-12-2024, 16:22. Yazar: sevinc1
Ulu Öndər Heydər Əliyevin anım günü ilə əlaqədar dekabrın 12-də Yeni Azərbaycan Partiyasının (YAP) Laçın rayon təşkilatında dəyirmi masa keçirilib
aia.az xəbər verir ki, əvvəlcə Ulu Öndər Heydər Əliyevin Laçın Rayon İcra Hakimiyyətinin binasının önündə yerləşən abidəsi ziyarət edilib, abidənin önünə gül dəstələri qoyulub.
YAP Laçın rayon təşkilatında keçirilən tədbirdə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.
Tədbiri giriş sözü ilə açan YAP Laçın rayon təşkilatının sədri İlqar İlyasov, Ulu Öndər Heydər Əliyevin xalqımız qarşısında tarixi xidmətlərindən bəhs edərək bildirib ki, Heydər Əliyev milli dövlətçiliyimizin inkişaf konsepsiyasını yaratdı. Ümummilli Liderin müdrikliyi və qətiyyəti sayəsində Azərbaycan müstəqil, demokratik, hüquqi və dünyəvi dövlət kimi inkişaf etməyə başladı. Respublikanın qarşısında duran problemlər mərhələlərlə həll olundu, əmin-amanlıq və siyasi sabitlik yarandı. İctimai-siyasi, sosial-iqtisadi, elmi və mədəni həyatda əsaslı dönüş başlandı, xalqımızın bütövlüyü, həmrəyliyi və milli birliyi təmin edildi. Ulu Öndər Heydər Əliyevin hakimiyyətə qayıdışından sonra ölkədə baş vermiş sosial-iqtisadi və siyasi inkişaf dövlətimizin möhkəmlənməsində, sivil dünyaya sıx inteqrasiya prosesinə qoşulmasında və xalqımızın strateji mənafelərini təmin edən modern cəmiyyətin qurulmasında həlledici rol oynadı. İlqar İlyasov, həmçinin vurğuladı ki, Azərbaycan dövləti Ulu Öndərin ideyaları əsasında inamla inkişaf edir. Hazırda işğaldan azad edilmiş ərazilərimizdə quruculuq və bərpa işləri böyük sürətlə davam edir və qarşıdakı dövrdə Böyük Qayıdış Proqramının tam icra olunması, ordumuzun daha da gücləndirilməsi əsas vəzifələr sırasındadır. Prezident İlham Əliyev bu istiqamətdə uğurlu siyasət həyata keçirir. Bütövlükdə, qazanılan nailiyyətlər Heydər Əliyev siyasətinin təntənəsi kimi qiymətləndirilir.
Çıxış edən Laçın Rayon İcra Hakimiyyətinin məsul əməkdaşı Məhəmməd Şahbazov, Ulu Öndərin Azərbaycan rəhbərliyinə qayıdışı ilə ölkənin ictimai-siyasi, sosial, iqtisadi, elmi-mədəni həyatında, beynəlxalq əlaqələrdə əsl dönüş yaratdığını və müstəqil dövlət quruculuğu prosesinə başlanıldığını qeyd edib. Azərbaycanın mürəkkəb və taleyüklü tarixi dövründə dövlətə rəhbərliyinin ağır məsuliyyətini öz üzərinə götürmüş Heydər Əliyevin müstəqil dövlət təlimi və onun ayrılmaz tərkib hissəsi olan bu ideologiyanın həyata keçirilməsi müstəqil dövlətimizin bugünkü varlığının və gələcək inkişafının əsasını təşkil edir. Məhz Ulu Öndərin ikinci dəfə xilaskarlıq missiyası ilə hakimiyyətə dönüşündən sonra Azərbaycanda bütün atributlara malik güclü dövlətin formalaşması prosesinə start verildi.
Laçın rayon 23 nömrəli tam orta məktəbin direktoru Sədaqət Məhərrəmova çıxışında Azərbaycanın inkişafında Ulu Öndər Heydər Əliyevin misilsiz rolundan danışıb. O qeyd edib ki, bu gün Heydər Əliyevin siyasi kursunun layiqli davamçısı olan cənab İlham Əliyevin məğrur və əzmkar fəaliyyəti ilə ölkəmizin müstəqilliyi daha da möhkəmləndi. Bu gün Azərbaycan, tarixin ən qüdrətli dövrünü yaşayır. Əsası Ulu Öndər Heydər Əliyev tərəfindən qoyulan Milli Ordu quruculuğu yüksək zirvəyə çatmışdır. Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə 2020-ci il sentyabrın 27-də başlayan və 44 gün davam edən zəfər yürüşü ilə Azərbaycan Ordusu Ermənistanın 30 il ərzində işğal altında saxladığı tarixi ərazilərimizi düşmən tapdağından azad edərək Ulu Öndərin vəsiyyətini həyata keçirdi.
Çıxış edən Laçın rayon Mişni kənd tam orta məktəbinin direktoru Qurban Həsənov Ulu Öndər Heydər Əliyevin özünün başladığı nəhəng işlərin uğurlu icrasını kimlərin təmin edə biləcəyini də müəyyənləşdirdiyini qeyd edib. Fiziki imkanlarının tükəndiyi bir vaxtda həmişə inandığı və etibar etdiyi xalqına müraciət ünvanlayaraq demişdi: "İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm." Bugünkü tarix sübut etdi ki, dahi şəxsiyyətin uzaqgörənliyini Azərbaycan Prezidenti, Ali Baş Komandan İlham Əliyev son 21 illik prezidentlik fəaliyyəti ilə təsdiqlədi.
Çıxış edən Laçın rayon 37 nömrəli tam orta məktəbinin direktoru Şaiq Məmmədov, ölkəmizdə uğurlu dövlət gənclər siyasətinin əsasının Ulu Öndər Heydər Əliyev tərəfindən qoyulduğunu qeyd edib. Ulu Öndər hər zaman gənclərə xüsusi qayğı ilə yanaşmış, onların problemləri daim Onun diqqət mərkəzində olmuş, yüksək intellektual səviyyəyə, müasir dünyagörüşünə malik gənc nəslin yetişməsinə böyük əhəmiyyət vermişdir. Ulu Öndər Heydər Əliyevin Azərbaycan gəncliyinə göstərdiyi böyük qayğı yalnız müstəqillik illərində deyil, hələ Sovet dönəmində də nəzərə çarpırdı. Belə ki, ötən əsrin 70-ci illərində məhz Ümummilli liderin təşəbbüsü və gərgin səyləri nəticəsində on beş mindən çox azərbaycanlı gənc SSRİ-nin 170-dən çox təhsil müəssisəsində ali təhsil almış, bu addım Azərbaycanda müxtəlif sahələr üzrə peşəkar kadr bazasının formalaşmasına xidmət etmişdir.
Geri dön