Vətənə sədaqət nümunəsi
12-11-2023, 10:57. Yazar: sevinc1
Samir Əlizadə oğlu Hüseynov Vətənini, doğma yurdunu ilahi bir məhəbbətlə sevirdi. Odur ki, Azərbaycanın müqəddəs parçası olan Qarabağın düşmən tapdağına düşməsinə ürəyi heç cür dözə bilmirdi. Elə həyatı dərk edəndən birinci arzusu əsarətdə olan Vətən torpaqlarını azad görmək olur. Və bunun yolunu hər bir Vətən övladının Ana torpağa, xalqına sədaqətli olmasında görür. İkinci Qarabağ müharibəsində qanı bahasına Ana torpağının şərəfini uca tutan Samir 26 yaşında şəhidlik zirvəsinə ucalmaqla ürəyinin istəyinə qovuşur. Gəlimli-gedimli dünyadan vaxtsız getməsi Vətənin yaşaması üçün olur. Məhz buna görə də Azərbaycanın mərd, igid oğlunun aramızdan getməsi cismanidir, zəfər tariximizə adını elə həkk edib ki, zaman-zaman heç bir qüvvə onu millətin qəlbindən silib apara bilməz. Əksinə ucaldığı müqəddəslik zirvəsindən sevdalı günlərə boylanan parlaq ziyası yüzlərin, minlərin həyat yoluna nur çiləyər.
Lerik rayonunun Vov kəndində yurd salan Hüseynovların el-obada böyük hörmət vardır. Əzəldən bu ocağının od götürüb, qeyrət içiləsi ərənləri olubdur. 1994-cü ildə dünyaya gəlmiş Samir Hüseynov da ailə ənənəsinə sadiq boy atır. Haqqa tapınmaq, halallıq, qurub-yaratmaq eşqi getdiyi yolda onu izləyir. Cəmiyyətdən ötrü xeyirli, işıqlı bir şəxs olaraq müstəqil həyata qədəm qoyur. 2013-cü ildə Milli Ordu sıralarına yola düşəndə artıq haqqın-ədalətin tərəfdarı olaraq, gördüyü nəcib işlər hesabına el-oba arasında özünəməxsus nüfuz qazanmışdı. Yaşına uyuşmayan kamilliyi, bütövlüyü, yurd məhəbbəti Vətənə ləyaqətli xidmətdə də özünü göstərir. Samir Vətən torpaqlarının erməni dığalardan təmizləməyi ən müqəddəs iş sayır...
Bütün həyatı Vətən sevgisinə köklənən, arzu-istəyi millətinin gələcəyini çıraqban görmək eşqi olan Samir xidmətdən sonra bir müddət halal zəhmətdən yapışır. Ötüb keçən hər gün ömrünə yadda qalan işlərlə iz salır. Amma dığaların xəyanətkar, təcavüzkar mövqeyi, Qarabağda baş verən qanlı hadisələr həmişə onu ciddi düşündürür, narahat edir. Odur ki, onlara qarşı mübarizə aparmaq üçün 2016-ci ildə könüllü hərbi xidmətə gedir. Vətən müharibəsində Xüsusi Təyinatlı Kəşfiyyatçı kimi döyüş meydanına girir. Samir döyüşdən-döyüşə atıldıqca sanki ona yeni bir güc, yeni bir qüvvə verilir. Odun-alovun içində düşmənə meydan oxuyanda yalnız Vətən torpaqların azadlığını düşünür. Zəngilanda, Füzulidə, Qubadlıda, Xocavənddə, Cəbrayılda, Şuşada ağır müharibə meydanında intiqam hissi ilə vuruşur, dığaların layiqli cəzasını verir. Şanlı zəfərimizə 13-14 saat qalmış şəhidlik zirvəsinə ucalır. Və bu şərəfli ölüm Samirə əbədi bir həyat qazandırır. Azərbaycan var olduqca, Samir kimi igid Vətən övladların adı ləyaqət, sədaqət, etibar rəmzi olaraq el-obaya başıucalıq gətirər.
Samir Hüseynov ölümündən sonra 3-cü dərəcəli “Vətənə xidmətə görə”, “Vətən uğrunda”, Şuşanın, Cəbrayılın, Xocavəndin, Füzulinin azadlığına görə medalları ilə təltif edilib.
Zəfər Orucoğlu,
Azərbaycan Jurnalistlər Birliyinin üzvü
aia.az
Geri dön