Vətən üçün yaşanan ömür
26-10-2023, 10:54. Yazar: sevinc1
Araz İbadlı xalqımızın qeyrət, hünər tarixi olan İkinci Qarabağ müharibəsində Vətən yolunda can qoyub, 21 yaşında şəhidlik zirvəsinə ucaldı. Beləcə, Lənkəran rayonunun Gəgiran kəndində Babalı kişinin halal ailə ocağında boya-başa çatan Araz bütün Azərbaycanın qürur yerinə, iftixar mənbəyinə çevrilir.
Araz lap uşaq yaşlarında Vətənin müqəddəsliyini dərk edir. Odur ki, erməni dığaların əzəli yurd yerimiz Qarabağın ədalətsiz işğalını heç cür vicdanına sığışdıra bilmir. Məktəbi bitirib əsgərliyə gedəndə deyir ki, ermənilərin qarşısında aciz durmaq bizə yaraşmır. Vətən torpaqların murdar düşmən tapdağından qurtulması mərd oğlanların qeyrətinə qalır. Qismətim olsa mən də yağı ilə son nəfəsimə qədər döyüşməyə hazıram.
Vətənini canından əziz bilən Araz cəbhə bölgəsində ona vicdanla xidmət edir. Komandirlərin tapşırıqlarını vaxtında, düzgün yerinə yetirir. Təlimlər zamanı əla döyüşçü keyfiyyətlərini göstərir. Məqamı çatanda müharibə meydanında düşməni əzmək üçün həmişə öyrənməyə can atır.
Hər an silaha sarılıb müharibə meydanına atılmaq üçün qəlbi alışıb yanan Araz 2020-ci ilin sentyabrında arzusuna çatır. Qələbə sorağı bir-birindən çətin, qeyri-bərabər döyüşlərdən gəlir. Hər qarış torpaq uğrunda mərdliklə vuruşur. Ordumuzun ard-ardına qazandığı uğurlarını görəndə qələbəmizin lap yaxında olduğuna tam inanır, növbəti gün döyüşə pəhləvan kimi girir. Nəticədə erməni dığaları onu qarşısında tab gətirə bilmir, ciddi itki verə-verə rüsvayçı şəkildə qaçmağa üz qoyurlar. Lənkəranın igid oğlu haqq savaşımızda oktyabrın 9-na qədər düşmənlə mərdliklə vuruşur, onlarla canlı qüvvəsini, neçə-neçə hərbi texnikasını məhv edir. Füzuli rayonu istiqamətində gedən ölüm-dirim müharibədə yağı tərəfindən atılan artilleriya atəşi nəticəsində müqəddəs şəhidlik zirvəsinə ucalır. Adı Azərbaycanın yeni zəfər tarixə yazılmaqla ölməzlık qazanır. Nə qədər xalqımız var, Araz da yaşayacaq.
Ölkə başçısının müvafiq sərəncamları əsasında Araz İbadlı ölümündən sonra “Vətən uğrunda”, “İgidliyə görə” və digər medallarla təltif olunub.
Geri dön