44 günün sehri
23-10-2023, 17:50. Yazar: sevinc1
44 gün- həyatımıza, ömrümüzə bütövlükdə dünya tarixinə yazılan bu 44 gün-mənliyimizi, qürurumuzu qaytaran bir şanlı zəfər səhifəsi oldu.Bir zamanlar adı çəkiləndə bağrımızın başı yanan, gözəlliklərinə həsrət qaldığımız,yuxularımızda gəzdiyimiz Qarabağ indi fəxr yerimiz, qürur mənbəyimizdir.
2020-ci il sentyabrın 27-də Ermənistan Respublikasının silahlı qüvvələri beynəlxalq hüquq normalarını yenidən kobud surətdə pozaraq Azərbaycan Respublikasının yaşayış məntəqələrini və hərbi mövqelərini atəşə tutmaqla törətdikləri növbəti hərbi təxribat nəticəsində mülki şəxslər və hərbçilər arasında ölən və yaralananlar oldu. Azərbaycan Respublikasının milli təhlükəsizliyinə qarşı real və potensial hərbi təhdidlərin qarşısının alınması və zərərsizləşdirilməsi üçün Azərbaycan Respublikasının Silahlı Qüvvələri tərəfindən əks-hücum əməliyyatlarına başlandı və bununla da tariximizin şanlı səhifələrinin əsası qoyuldu.
Ordumuzun həyata keçirdiyi uğurlu hərbi əməliyyatlar nəticəsində Ermənistan Respublikasının silahlı qüvvələri darmadağın edilərək, canlı qüvvə və texnika sarıdan böyük itkilər verərək geri çəkilməyə məcbur qaldı. Döyüş meydanındakı məğlubiyyətlərinin əvəzini çıxmaq üçün cəbhə xəttindən uzaqda yerləşən şəhər və rayonlarındakı mülki infrastruktur obyektlərini – yaşayış evlərini, xəstəxanaları, tibb məntəqələrini, məktəb binalarını, uşaq bağçalarını, dövlət qurumlarının inzibati binalarını, təsərrüfat təyinatlı əraziləri hədəf seçmiş, müxtəlif növ silahlarla, o cümlədən artilleriya və ballistik raketlərlə atəşə tutaraq insanlıq əleyhinə cinayətlər və müharibə cinayətləri törətmiş, mülki şəxsləri vəhşicəsinə qətlə yetirmiş, mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə irimiqyaslı zərər vurmuşlar.
Noyabrın 7-dək 53 kəndi və strateji yüksəkliyi azad edən Ordumuzun növbəti hədəfi qədim Şuşa şəhəri idi. Nəhayət 8 noyabr 2020-ci il xəyallarımızın gerçəkləşdi. Əbədi yaddaşlarımızda yaşayacaq bu tarix mənliyimizin,milli kimliyimizin, birliyimizin qələbəsi oldu.
Ali Baş Komandanımız İlham Əliyevin xalqa müraciətlə dediyi sözlər hər bir azərbaycanlının kədəri közə dönmüş gözlərinə işıq gətirdi,Vətən həsrəti ilə od tutmuş ürəklərə su səpdi. “Bu tarixi bir gündə Azərbaycan xalqına bu müjdəni vermək mənim həyatımda bəlkə də ən xoşbəxt günlərimdən biridir. İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, Zəfərimizin günüdür!
Əziz Şuşa, sən azadsan!
Əziz Şuşa, biz qayıtmışıq!
Əziz Şuşa, biz səni dirçəldəcəyik!
Şuşa bizimdir! Qarabağ bizimdir! Qarabağ Azərbaycandır!”
Cəmilə Camal qızı Səlimova
ADPU-nun nəzdində Azərbaycan
Dövlət Pedaqoji Kollecinin fizika müəllimi
Geri dön