Həkim olmaq istəyən fiziki məhdudiyyətli uşağın arzusu Yeni Klinikada reallaşdı
16-10-2023, 18:28. Yazar: sevinc1
Bakı şəhər DYP İdarəsinin təşəbbüsü, TƏBİB-in tabeliyində fəaliyyət göstərən Yeni Klinikanın dəstəyi ilə fiziki məhdudiyyətli, 6 yaşlı Ədalətin həkim olmaq arzusu bir günlük də olsa reallaşıb.
Belə ki, "Diqqət, uşaqlar!" adı altında hərəkətin təhlükəsizliyi aylığına həsr olunmuş tədbir zamanı Bakı şəhər DYP İdarəsinin baş inspektoru, polis moyoru Araz Əsgərlinin “Gələcəkdə nə işləmək istəyirsən?” sualına “həkim” deyə, cavab verən Ədalət üçün Yeni Klinika daxilində tur keçirilib.
Tur zamanı Ədalət “doktora” Yeni Klinikanın əməkdaşları bələdçilik edib.
Tanışlıq çərçivəsində Ədalət klinikanın direktor müavini, Cərrahiyyə və transplantasiya mərkəzinin rəhbəri Eldar Əhmədovun və TƏBİB-in icraçı direktorunun müşaviri, Yeni Klinikanın İdarə Heyətinin üzvü Pərvin Əkbərovun da qəbulunda olub.
Məlumat üçün bildirək ki, Pərvin Əkbərov Ədalətin fizioterapiya və reabilitasiyası məqsədi ilə müvafiq prosedurlarının icra ediləcəyini də vurğulayıb.
aia.az
Geri dön