Ülviyyə Əliyeva: “Ölkəmizdə gender bərabərliyi bütün sahələrdə təmin olunub”
9-10-2023, 16:14. Yazar: sevinc1
Lənkəran Şəhər İcra Hakimiyyətinin təşkilatçılığı sayəsində Lənkəran şəhər Heydər Əliyev Mərkəzində baş tutan növbəti tədbir ulu öndər Heydər Əliyevin 100 illik yubileyinə və Azərbaycan Qadınlar Qurultayının 25 illiyinə həsr olunmuşdu. “Azərbaycan Qadınlarının VI Qurultayı” adlı tədbirdə Ulu öndərin və Vətən yolunda canlarını fəda edən şəhidlərin əziz xatirəsi bir dəqiqəlik sükutla anıldı.
Lənkəran ŞİH başçısının müavini, İctimai-siyasi və humanitar məsələlər şöbəsinin müdiri Ülviyyə Əliyeva tədbir iştirakçıların qarşısında çıxış etdi:- Ümummilli lider Heydər Əliyev ölkəmizdə dövlət-qadın siyasətinin əsas prinsiplərinin müəyyən etməsinin təşəbbüskarı olub, gender bərabərliyinə hər zaman xüsusi önəm verib. Bu, dahi şəxsiyyət qadınların idarəetmə, qərar qəbuletmə və sosial həyatın bütün sahələrində irəli çəkməsini daim dəstəkləyib. Respublikamızda 1998-ci ildə ilk qadın qurultayının keçirilməsi də məhz ümummilli liderin adı ilə bağlıdır. Ulu Öndər tərəfindən əsası qoyulan qadın siyasəti bu gün onun layiqli davamçısı cənab Prezident İlham Əliyev tərəfindən uğurla yerinə yetirilir.
Natiq çıxışının axırında onu da bildirdi ki, ölkəmizdə gender bərabərliyi bütün sahələrdə təmin olunub və bu istiqamətdə mütəmadi işlər görülür. Birinci vitse-prezident Mehriban xanım Əliyeva Azərbaycan qadınını ən mükəmməl səviyyədə bütün tribunalarda təmsil edir.
Mövzu ilə bağlı çıxış edən Lənkəran Dövlət Universitetinin baş müəllimi Nahidə Cəfərova, tələbə Şərqiyyə Rəcəbova, Lənkəran şəhər 4 nömrəli məktəb-liseyin direktoru Səadət Kazımova və digərləri bildirdilər ki ulu öndər qadınlarla bağlı siyasətin gücləndirilməsini dövlətin mühüm vəzifəsi hesab edib, qadınlarla bağlı məsələlərin vahid mərkəzdən idarə olunması üçün ayrıca dövlət qurumunu yaradıb və müəllifi olduğu Ali Qanunda qadınların kişilərlə bərabər hüquqlara sahib olduğu təsdiqini tapıb.
Zəfər Orucoğlu,
Azərbaycan Jurnalistlər Birliyinin üzvü
aia.az
Geri dön