27 sentyabr- Anım Günü münasibətilə Əmrahın hünər dastanı
27-09-2023, 09:32. Yazar: sevinc1
İkinci Qarabağ müharibəsində tarix yazıb şəhidlik zirvəsinə ucalan Əmrah Şahid oğlu Əkbərov ömrünün 22-ci baharına təzəcə qədəm qoymuşdu. Dağlar diyarı Lerik rayonunun Livədirqə kəndində dünyaya göz açmış, ad qoyub tarixdə yaşamaq hüququ qazanan, tarixi yaşadan igidimiz H. Əliyev adına Ali Hərbi Məktəbi təzəcən bitirmişdi. Leytenant rütbəsində Xüsusi Təyinatlı Qüvvələrdə xidmətə başlamışdı. Doğma Azərbaycana sədaqətlə qulluq etmək onun həyat amali idi.
Vətənə, torpağa bağlı, köksündə qəhrəman ürəyi döyünən Əmrah Əkbərov müharibə başlanan andan 30 il düşmən tapdağına dönən müqəddəs yurd yerlərin azadlığı naminə baş kəşfiyyatçı kimi döyüşə atılır. Vətənini canından əziz tutmaqla hər an onun yolunda ölməyə hazır durur. Füzuli, Cəbrayıl istiqamətlərində gedən qeyri- bərabər döyüşlərdə yağı düşmənin texnikasını, canlı qüvvəsini məhv edir. Əmrah hər dəfə odun-alovun içinə atılanda yağıdan sona qədər döyüşərək qisasını alacağına and içir.
12 oktyabrda Hadrut qəsəbəsinin azad olunması üçün ağır müharibə başlanır. Həmişə olduğu kimi, Əmrah yenə qalib olmaq istəyi ilə döyüşür. Düşmən çoxlu itki versə də, Əmrahın dəstəsi mühasirəyə düşür. O, yoldaşlarını xilas etmək üçün özünü düşmənin səngərinə atır və üzərindəki qumbaranı partadır. Beləcə Vətən, torpaq, əqidə naminə Əmrah öz həyatını qurban verir, yoldaşlarını qoruyur, düşmən məğlub olur. Həm də igid leytenantın torpağa axıtdığı bu qan onun Vətənə son övladlıq borcu olur.
Bəli, indi bütün Azərbaycan xalqı öz qəhrəman oğlu ilə fəxr edir, onun keçdiyi şərəfli həyat yolunu Vətənə sədaqət nümunəsi bilirlər. Dövlət də öz növbəsində igid Əmrahının haqq savaşımızda göstərdiyi qəhrəmanlığına yüksək dəyər vermişdir. Ölümündən sonra “Vətən uğrunda”, “Cəbrayılın azad olunmasına görə”, “Xocavəndin azad olunmasına görə” medallara layiq görülüb.
Zəfər ORUCOĞLU,
Azərbaycan Jurnalistlər Birliyinin üzvü
aia.az
Geri dön