Astarada Dünya çempionu ilə görüş
13-09-2023, 09:17. Yazar: sevinc1
Astarada icra başçısı Qəzənfər Ağayev dünyada tanınan astaralı idmançı Məhəmmədəli Axundovu qəbul edib. O, Vinq Çun kontakt üzrə yeniyetmələr arasında Dünya çempionu təbrik edərək bildirib ki, ölkə Prezidenti cənab İlham Əliyevin rəhbərliyi altında indi Azərbaycan dünyada həm də bir idman ölkəsi kimi tanınır. Respublikamızda idmanın inkişafı və idmançılara yaradılan yüksək şəraitdən yararlanan gənclərin müxtəlif beynəlxalq yarışlarda uğurlar qazanaraq Şanlı Bayrağımızı yüksəklərə qaldırması bizi qürur verir, hədsiz sevindirir. Yeniyetməlik yaşında çətin bir idman növündə dünya çempionu adını qazanmağın şərəfinə Dövlətimizin Himninin səslənməsi, Bayrağımızın qaldırılması bizə böyük fəxarət hissi yaşadır. Bu möhtəşəm qələbə münasibətilə ürəkdən sevinib, sənə daha böyük uğurlar arzulayıram.
Vinq Çun kontakt üzrə yeniyetmələr arasında Dünya çempionu M. Axundov səmimi qəbula və xoş sözlərə görə icra başçısına minnətdarlıq etdikdən sonra deyib: - 2008-ci ildə Astara rayonunun Ərçivan qəsəbəsində anadan olmuşam. 2013-cü ildən idmanın Uşu-sandu növünə həvəs göstərirəm. 2017, 2018 və 2019-cu illərdə bu idman növündə Respublika çempionu olmuşam. Ən böyük uğuru isə bu ilin avqust ayının 14-18-də Çin Xalq Respublikasının Honkonq şəhərində keçirilən Çin Döyüş Növləri üzrə 15-ci Beynəlxalq Uşu Müsabiqəsi və Vinq-Çun üzrə 11-ci dünya çempionatında qazandım. Yarışda otuz ölkədən 2 mindən çox atlet iştirak edirdi. Yarışmada ölkəmizi təmsil edən Vinq Çun Federasiyasının 12 idmançısından biri olaraq bütün rəqiblərimə qalib gələrək qızıl medal qazanmaqla ilk böyük idman uğuruna imza atdım. Həmçinin komandamız yüksək nəticə göstərərək 6 qızıl, 4 gümüş medal qazandı. Hazırda Azərbaycan yığma komandasının tərkibində məşqçi-müəllim Asif Sayadovun rəhbərliyi altında məşq edirəm, bu ilin noyabrında Yunanıstanda keçiriləcək Avropa çempionatına hazırlaşıram.
Görüş zamanı İcra başçısı Məhəmmədəli Axundovu “ Fəxri fərman “ və qiymətli hədiyyə ilə mükafatlandırıb.
Zəfər Orucoğlu,
Azərbaycan Jurnalistlər Birliyinin üzvü
aia.az
Geri dön