Beynəlxalq Atıcılıq İdmanı Federasiyasının nümayəndə heyəti Gəncədə
30-08-2023, 16:23. Yazar: sevinc1
Gəncə şəhər İcra Hakimiyyətinin başçısı Niyazi Bayramov Beynəlxalq Atıcılıq İdmanı Federasiyasının baş katibi Villi Qrillin rəhbərlik etdiyi nümayəndə heyəti ilə görüşüb.
aia.az xəbər verir ki, görüş tikintisi davam edən Gəncə İdman Sarayında baş tutub.
Qonaqları salamlayan Niyazi Bayramov bildirib ki, Prezident İlham Əliyevin müvafiq Sərəncamı ilə inşası davam etdirilən Gəncə İdman Sarayı Qafqazın ən böyük idman qurğularından hesab edilir. Şəhər rəhbəri qeyd edib ki, idman sarayı gələcəkdə beynəlxalq yarışların keçiriləcəyi məkana çevriləcək. Bu yarışların keçirilməsinin həm idman sahəsi, həm də şəhər iqtisadiyyatının inkişafı üçün çox faydalı olacağı qeyd olunub. Həmçinin, 2025-ci ildə MDB ölkələrinin III oyunlarının da burada baş tutacağı diqqətə çatdırılıb.
Beynəlxalq Atıcılıq İdmanı Federasiyasının baş katibi Villi Qrill səmimi görüş üçün təşəkkürünü bildirib və idman sarayının beynəlxalq standartlara cavab verdiyini söyləyib.
Görüşdə atıcılıq üzrə Avropa çempionatının Gəncə İdman Sarayında təşkil edilməsi ətrafında müzakirələr aparılıb.
Azər Tağızadə
Geri dön