Ulu öndər Heydər Əliyev və milli dövlətçilik
26-08-2023, 13:30. Yazar: sevinc1
Astarada Lənkəran-Astara Regional Gənclər və İdman İdarəsi və Lənkəran-Astara Regional Mədəniyyət İdarəsinin birgə təşkilatçılığı sayəsində “Azərbaycan xalqının ümummilli lideri Heydər Əliyev və milli dövlətçilik” mövzusunda dəyirmi masa keçirilib.
Ulu öndər Heydər Əliyev 100 illiyinə həsr olunmuş, rayonun Heydər Əliyev Mərkəzində baş tutan tədbirdə Lənkəran-Astara Regional Gənclər və İdman İdarəsinin Astara rayonu üzrə gənclər və idman sektorunun əməkdaşları, şəhid ailəsinin üzvləri, Müharibə, Əmək və Silahlı Qüvvələr Veteranlar Təşkilatının Astara rayon şöbəsinin sədri, Qarabağ müharibəsi veteranları və digər qonaqlar iştirak ediblər.
Astara rayon Heydər Əliyev Mərkəzinin direktoru Kübra Səmədova tədbiri açıb, ulu öndər Heydər Əliyevin və Vətən yolundan canından keçən şəhidlərin əziz xatirəsi bir dəqiqəlik sükutla anılıbdır.
Daha sonra “Ulu Öndər Heydər Əliyev Müstəqil Azərbaycanın memarıdır” mövzusunda qısametrajlı film nümayiş olunubdur.
Çıxış edənlər Müstəqil Azərbaycanın memarı, türk dünyasının dahi oğlu ümummilli lider Heydər Əliyevin həyat və fəaliyyəti barədə geniş məlumat verməklə bildiriblər ki, ulu öndər milli ideyamızı formalaşdırarkən azərbaycançılığı milli dövlətçilik ideyası kimi sistemləşdirmiş, onu ümummilli məfkurə, dünya azərbaycanlılarının ideologiyası kimi müəyyənləşdirmişdir. Bu gün xalqımız Heydər Əliyevin siyasi varisi - yüksək intellektli, praqmatik düşüncəli, müasir dünya siyasətini və iqtisadiyyatını dərindən bilən Azərbaycan Respublikasının Prezidenti cənab İlham Əliyevin ətrafında sıx birləşmişdir.
Tədbirdə həm də Vətən müharibəsində şəhid olmuş Ruslan Əliyevin anası Təranə Əliyeva və Kamran Seyfullazadənin bacısı Samirə Seyfullazadəyə Müharibə, Əmək və Silahlı Qüvvələr Veteranlar Təşkilatının Fəxri Fərmanları verilibdir.
Yekunda tədbir iştirakçıları Astara Dövlət Rəsm Qalereyasının rəssamlıq dərnəyinin üzvlərinin çəkdikləri rəsmlərdən ibarət sərgiyə baxıblar.
Zəfər Orucoğlu,
Azərbaycan Jurnalistlər Birliyinin üzvü
aia.az
Geri dön