Deputat Novruzəli Aslanov mərhum sənətkar İlhamə Quliyevanın məzarını ziyarət edib
17-08-2023, 12:03. Yazar: sevinc1
Bu gün, avqust ayının 17-si mərhum sənətkarımız İlhamə xanım Quliyevanın doğum günüdür.
AİA.Az xəbər verir ki, bu münasibətlə Milli Məclisin deputatı, İlhamə xanımın ifa etdiyi bir çox gözəl mahnıların bəstəkarı Novruzəli Aslanov özünün facebook səhfəsində paylaşım edib: “Bu gün öz gözəl, bənzərsiz səsi ilə ərsəyə gətirdiyi mahnıları ilə milli musiqi mədəniyyətimizin inkişafına töhfələr vermiş ustad sənətkar – Azərbaycanın və Dağıstanın xalq artisti, “Şöhrət” , “Şərəf” ordenli müğənni, uzun illər, Azərbaycan Qızıl Aypara Cəmiyyətinin inkişafında xidmətləri olmuş gözəl qəlbli insan İlhamə xanım Quliyevanın anadan olmasının 80 ili tamam olur. İlhamə Quliyevanın neçə-neçə gəncin sənətə gəlməsində, irəliləməsində, inkişafında böyük əməyi, xidmətləri vardır. O, çox mərd təbiətli bir şəxs idi. Onun üçün həyatda bir meyar var idi: “Sənət , yeni-yeni mahnılar, xalqın sevgisi, vətənə , dövlətə, dövlətçiliyə məhəbbət”. Mədəniyyət tarixində əbədiyaşarlıq qazanmış, xatirələrdə olduğu kimi qalan böyük sənətkarı ehtiramla yad edirik. Ruhu şad olsun!”
Geri dön