İcra başçısı Gəncə Regional Turizm İdarəsinin rəisi ilə görüşüb
16-08-2023, 19:00. Yazar: sevinc1
Məlum olduğu kimi, ölkə başçısı İlham Əliyev Azərbaycan Respublikası Dövlət Turizm Agentliyinin strukturunun təkmilləşdirilməsi və “Azərbaycan Respublikası Dövlət Turizm Agentliyinin fəaliyyətinin təmin edilməsi haqqında” Azərbaycan Respublikası Prezidentinin 2018-ci il 21 sentyabr tarixli 278 nömrəli Fərmanında dəyişiklik edilməsi barədə Fərman imzalayıb. Fərmana əsasən, Azərbaycan Respublikası Dövlət Turizm Agentliyinin Gəncə şəhəri də daxil olmaqla 8 regional idarəsi yaradılıb. Agentliyin müvafiq əmri ilə Zaur Bayramov Gəncə Regional Turizm İdarəsinə rəis təyin olunub.
aia.az xəbər verir ki, Gəncə şəhər İcra Hakimiyyətinin başçısı Niyazi Bayramov Regional Turizm İdarəsinin rəisi ilə görüşüb. Görüşdə qədim Nizami yurdunun turizm potensialı və bu sahədə həyata keçirilən tədbirlərdən söz açılıb, perspektivdə duran məsələlər müzakirə edilib.
Şəhər rəhbəri Z.Bayramova tapşırıq və tövsiyələrini verib, ona gələcək fəaliyyətində uğurlar arzulayıb.
Məlumat üçün bildirək ki, yeni yaradılan Gəncə Regional Turizm İdarəsi Gəncə şəhəri də daxil olmaqla 11 bölgəni əhatə edir.
Azər Tağızadə
Geri dön