Azərbaycanda ordu quruculuğu işi Prezident İlham Əliyev tərəfindən müasir tələblərə uyğun yeni formatda uğurla davam etdirilir
25-06-2023, 17:07. Yazar: sevinc1
Son 20 il ərzində Azərbaycanda ordu quruculuğu sahəsində görülən böyük işlər, həyata keçirilən əsaslı islahatlar Silahlı Qüvvələrimizin bu gün dünyanın ən güclü 50 ordusu sırasında yer almasına səbəb olub. Etiraf etmək lazımdır ki, ölkəmizin beynəlxalq mövqelərinin getdikcə möhkəmlənməsi, dünyanın aparıcı siyasi təsisatlarında nüfuzlu söz sahibinə çevrilməsi güclü ordu olmadan mümkün ola bilməzdi. Hər yeni gün məhz güc amilinin daha çox həlledici amil kimi ortaya çıxdığı müasir dünyada güclü ordusuz heç bir ölkə özünün suverenliyinə, xalqının əmin-amanlıq içərisində yaşamasına təminat verə bilməz. Azərbaycan bunu öz təcrübəsindən çox yaxşı bilir. Ölkəmizin ərazi bütövlüyünün pozulması və Ermənistanın işğalçı siyasətinin dünyada tanıdılması istiqamətində 2003-cü ildən bəri son dərəcə uğurlu diplomatik iş aparan cənab Prezident İlham Əliyev hər zaman deyirdi ki, Azərbaycan münaqişənin sülh yolu ilə həllinin tərəfdarıdır və buna nail olmaq üçün bütün imkanlardan istifadə etməyə hazırdır. Ölkəmizin bu mövqeyini, sülhsevərliyimizi düzgün qiymətləndirməyən əksər beynəlxalq təşkilatlar isə, dünyada və xüsusən də Azərbaycanda münaqişənin ümumiyyətlə hərbi yolla həlli variantını istisna edən ideyanın formalaşması və qəbul olunması üçün əllərindən gələni edirdilər. Lakin Ölkə Prezidenti, Silahlı Qüvvələrin Ali Baş Komandanı cənab İlham Əliyev bu kimi cəhdləri hər bir çıxışında, hər bir bəyanatında tamamilə alt-üst edirdi. Möhtərəm dövlət başçımız hər zaman öz qətiyyətli və prinsipial mövqeyindən çıxış edərək, birmənalı şəkildə deyirdi ki, mövcud münaqişənin hərbi yolla həlli mümkündür və lazım gələrsə Azərbaycan bu hüququndan istifadə edəcək. 30 il davam edən danışıqlar heç bir nəticə vermədi və bütün bu siyasi gedişlərin yalnız münaqişəni dondurmaq və Azərbaycan xalqını işğalla barışdırmaq cəhdləri olduğu artıq heç kimdə şübhə doğurmurdu. Yalnız bundan sonra, 2020-ci il sentyabrın 27-də Silahlı Qüvvələrimiz erməni təxribatlarına birdəfəlik son qoymaq və torpaqlarımızı işğaldan azad etmək məqsədilə hərbi əməliyyatlara başlamaq haqqında Ali Baş Komandanın əmrini aldılar. Əks hücum əməliyyatı ilə başlayan 44 günlük Vətən müharibəsində Şanlı Ordumuz düşmən üzərində tam və qəti qələbə qazandı. Bütün dünya Azərbaycanın şanlı qələbəsinin şahidi oldu.
Əlbəttə ki, bütün Cənubi Qafqaz regionu üçün, bütün Türk dünyası üçün böyük tarixi əhəmiyyət kəsb edən bu Qələbə ilk növbədə ölkəmizdə əsası Ulu Öndər Heydər Əliyev tərəfindən hələ ötən əsrin 70-ci illərində qoyulmuş və müstəqillik illərində daha da genişləndirilmiş, bu gün isə cənab Prezident İlham Əliyev tərəfindən müasir tələblərə uyğun yeni formatda uğurla davam etdirilən effektiv ordu quruculuğunun nəticəsi olaraq əldə edilib. Silahlı qüvvələrin modernləşdirilməsi Azərbaycan Prezidenti cənab İlham Əliyevin dövlət siyasətinin əsas strateji isiqamətlərindən biridir. Ölkəmizin son illərdə dinamik inkişafı silahlı qüvvələrin büdcəsinin artması və nəticə etibarilə ordumuzun güclənməsi ilə müşayiət olunması möhtərən dövlət başçımızın Ordu quruculuğu ilə əlaqədar bütün işlərə son dərəcə həssas yanaşdığını bir daha təsdiq edir. Azərbaycan Prezidenti, Ali Baş Komandan cənab İlham Əliyevin xüsusi diqqət və qayğısı sayəsində son illərdə ordunun döyüş qabiliyyəti daha da yüksəlmiş, maddi-texniki bazası əhəmiyyətli dərəcədə möhkəmləndirilmiş, hərbçilərin sosial vəziyyətinin yaxşılaşdırılması istiqamətində mühüm addımlar atılmışdır. Bu gün Qafqazda ən müasir ordu hesab olunan Azərbaycan Milli Silahlı Qüvvələri Hərbi Hava və Hava Hücumundan Müdafiə, Hərbi Dəniz və Quru qoşunlarından ibarətdir. Qürurverici haldır ki, Azərbaycan MDB məkanında ən güclü hava hücumundan müdafiə qüvvələrinə malik ölkələrdən sayılır. Bu gün Azərbaycan Ordusunun Türkiyə Silahlı Qüvvələrinin standartlarına uyğunlaşdırılması istiqamətində dövlət tərəfindən genişmiqyaslı tədbirlər həyata keçirilir. O cümlədən ötən il hərbi təhsil sahəsində idarəetmənin təkmilləşdirilməsi məqsədilə Milli Müdafiə Universiteti yaradılıb. Milli Müdafiə Universitetinin başlıca vəzifələrindən biri Azərbaycan Ordusunda ali hərbi təhsilin bütün səviyyələri və əlavə təhsil proqramları üzrə ixtisaslı kadrlar hazırlamaqdır. Azərbaycan Ordusunun Təlim və Tədris Mərkəzi, Cəmşid Naxçıvanski adına Hərbi Lisey və Heydər Əliyev adına Hərbi Lisey də Milli Müdafiə Universitetinin tabeliyinə verilib. Əlbəttə ki, bütün bu tədbirlər hərbiçilərimizin təhsil səviyyələrinin və döyüş hazırlıqlarının daha da yüksəlməsinə xidmət edəcək.
Sonda bir məqamı da xüsusi vurğulamaq lazımdır ki, bu gün ölkəmizdə aparılan ordu quruculuğu siyasətinin vacib tərkib hissələrindən biri də hərbiçilərimizin Vətən müharibəsinin gedişində nümayiş etdirdikləri misilsiz qəhrəmanlıqlarının əbədiləşdirilməsi işidir. Bu məqsədlə Ölkə Prezident cənab İlham Əliyevin təşəbbüsü ilə Vətən Müharibəsində qələbə münasibətilə Azərbaycan Respublikasının “Zəfər” və “Qarabağ” ordenləri, həmçinin 15 yeni medal təsis edilmişdir ki, bu da tarixi Qələbəmizin əbədiləşdirməsi baxımından müstəsna rol oynayır və eyni zamanda da müharibə iştirakçılarına dövlətimiz tərəfindən göstərilən ali diqqətinin bariz təcəssümü kimi çıxış edir.
Lütvəli Şıxəliyev,
YAP Saatlı rayon təşkilatının sədri
Geri dön