Gəncədə müharibə veteranlarına vəsiqələr təqdim olunub
8-06-2023, 18:40. Yazar: sevinc1
Gəncə şəhər İcra Hakimiyyətinin dəstəyi, Müdafiə Nazirliyi, Səfərbərlik və Hərbi Xidmətə Çağırış üzrə Dövlət Xidmətinin Gəncə şəhər Nizami və Kəpəz şöbəsinin birgə təşkilatçılığı ilə Vətən müharibəsi iştirakçılarına "Müharibə veteranı" vəsiqələrinin təqdim olunması ilə bağlı tədbir keçirilib.
aia.az xəbər verir ki, Heydər Əliyev "Park-Xiyaban" Kompleksində baş tutan tədbirdə Gəncə şəhər İcra Hakimiyyətinin başçısı Niyazi Bayramov, Müdafiə Nazirliyinin, SHXÇDX-nin Gəncə şəhər Nizami və Kəpəz şöbələrinin, Gəncə şəhər İHB Aparatının məsul əməkdaşları, şəhid ailələri, qazilər və veteranlar iştirak ediblər.
Öncə Azərbaycan Respublikasının Dövlət Himni səsləndirilib. Ümummilli Lider Heydər Əliyevin və ölkəmizin ərazi bütövlüyü uğrunda gedən döyüşlərdə şəhid olanların əziz xatirəsi bir dəqiqəlik sükutla yad olunub.
Mərasimdə Gəncə şəhər İH-nin başçısı Niyazi Bayramov çıxış edərək Vətən müharibəsi zamanı Müzəffər Ali Baş Komandan, Prezident İlham Əliyevin rəhbərliyi və rəşadətli Azərbaycan Ordusunun gücü ilə işğal altında olan torpaqlarımızın çox qısa bir müddətdə, 44 gün ərzində azad edildiyini bildirib. Natiq ölkə rəhbərliyinin şəhid ailələri, qazilər və müharibə veteranlarına göstərdiyi hərtərəfli diqqət və qayğıdan söz açıb.
Sonra müharibə iştirakçılarına "Müharibə veteranı" vəsiqələri təqdim olunub.
Tədbirin sonunda xatirə şəkli çəkdirilib.
Azər Tağızadə
Geri dön