Astarada idmançılarla görüş
5-06-2023, 10:31. Yazar: sevinc1
25-29 may 2023-cü il tarixlərdə Dünya Budo Döyüş Növləri Federasiyasının Bakı şəhərində keçirilən Budo döyüş növləri üzrə açıq Beynəlxalq çempionatında Astara rayon komandası uğur qazanaraq fəxri yerlər sahib çıxıb. Astara Rayon İcra Hakimiyyətinin başçısı Qəzənfər Ağayev bu münasibətlə Beynəlxalq çempionatda qalib gəlmiş astaralı idmançıları ilə görüş keçirib.
Görüşdə Savat Federasiyasının nəzdində fəaliyyət göstərən “Astara Aslan” Əlbəyaxa Döyüş İdman Klubunun direktoru, III Dan Qara kəmər ustası Zamin Baxşıyev öz çıxışında bildirib ki, Azərbaycan, Türkiyə, Pakistan, Özbəkistan, İraq, Tacikistan, Qırğızıstan, Türkmənistandan olan 300-dək idmançının mübarizə apardığı açıq Beynəlxalq çempionatda astaralı idmançılar 4 qızıl və 3 gümüş medal qazanıblar. Yəni Free kontakt versiyası üzrə Səbinə Səmədzadə ( 40 kq, 2010), Mirzə Əliyev (50 kq, 2008), Ümüd Zeynallı (50 kq, 2009), Orxan Mirzəyev ( 60 kq, 2008) birinci, Sərdar Həmidzadə ( 30 kq, 2009 ), Hasil Yusifli ( 30 kq, 2011), Şəhriyar Mərufzadə (25 kq, 2010) ikinci yeri qazanıblar.
Qalib idmançılara söz veriləndə onlar yarış haqqında təəssüratlarını bölüşüb, səmimi qəbula və dəstəyə görə icra başçısına minnətdarlıq ediblər. İcra başçısı öz növbəsində idmançıları beynəlxalq yarışda qazandıqları qələbə münasibətilə təbrik edərək xoş arzularını bildirib və onlara hədiyyələr verib.
“Ölkə başçısı cənab İlham Əliyevin rəhbərliyi altında gündən-günə çiçəklənən Azərbaycan indi dünyada həm də idman ölkəsi kimi tanınır. Ölkəmizdə müxtəlif idman növləri üzrə beynəlxalq turnirlərin keçirilməsi ənənəvi hal almışdır. Mayın 29-da Bakıda dahi bir mötəbər idman yarışı - taekvondo üzrə 26-cı dünya çempionatının açılış mərasimi olmuşdur.” Bu fikirlərə çıxışa başlayan rayon rəhbəri daha sonra deyib:- Ulu Öndər Heydər Əliyevin anadan olmasının 100 illik yubileyinə və Dünya Taekvondo Federasiyasının 50 illiyinə təsadüf edən, 145 ölkədən 949 idmançının qatıldığı çempionatın açılışında Azərbaycan Respublikasının Prezidenti İlham Əliyev və birinci xanım Mehriban Əliyeva da iştirak etmişlər. Bir neçə gün öncə isə daha bir beynəlxalq turnirin - Azərbaycanda ilk dəfə olaraq 3x3 Dünya Qadın Seriyası oyunlarının rayonumuzda təşkilinə də şahidi olduq. Belə böyük idman yarışlarının paytaxtla yanaşı rayonlarda yüksək səviyyədə keçirməsi bizi sevindirir, idmançıları isə yeni qələbələrə aparır.
Ölkədə idmana və idmançılara göstərilən xüsusi diqqət və qayğının nəticəsidir ki, gənclərimiz müxtəlif idman növlərində beynəlxalq yarışlarda uğurla çıxış edərək qürur mənbəyimiz olan Şanlı Bayrağımızı yüksəklərə qaldırırlar. Əminəm ki, siz də bu ənənəni davam etdirərək daha böyük qələbələr qazanarsınız. Bu yolda hər birinizə uğurlar arzulayıram.
Zəfər Orucoğlu,
Azərbaycan Jurnalistlər Birliyinin üzvü
Geri dön