Mingəçevirdə təmizlik-abadlıq işləri davam edir
25-04-2023, 17:22. Yazar: sevinc1
Azərbaycan Respublikasının Prezidenti İlham Əliyevin regionların sosial-iqtisadi inkişafı Dövlət Proqramının həyata keçirilməsi məqsədi ilə imzaladığı müvafiq Fərmanlara əsasən ölkəmizin hər yerində olduğu kimi Mingəçevir şəhərində də tikinti-quruculuq, təmizlik-abadlıq işlərinin sahəsi genişlənir.
aia.az xəbər verir ki, aparılan təmizlik-abadlıq işlərində Mingəçevir şəhər Yaşıllaşdırma və Sanitar Təmizlik idarəsinin kollektivi xüsusi fəallığıyla seçilir. Günboyu idarənin əməkdaşları və texnikası şəhərin küçə və prospektlərində təmizlik işləri aparırlar. İşlər səhər saatlarından şəhərin şərq qapısından qərb qapısına qədər davam etdirilir.
Energetiklər şəhərinin küçə və prospektləri, yolları, parkları, xiyabanları, əsas nəqliyyat körpüsünün məhəccərləri, işıq dirəkləri idarənin əməkdaşları tərəfindən yuyulur.
bu günədək şəhərin müxtəlif ünvanlarında böyük həcmli işlər yerinə yetirilib. Ağacların budanması, ömrünü başa vurmuş ağacların kəsilməsi təmin olunub. Mövcud yaşıllıq zolaqlarının suvarılması üçün su xətləri çəkilərək istifadəyə verilib. Sakinlərin və şəhərin qonaqlarının məmnunluq hisslərini artırmaq üçün yerli iqlimə uyğun yeni tinglər, gül-çiçək kolları və dekorativ ağaclar basdırılıb.
Mingəçevir şəhər Yaşıllaşdırma və Sanitar Təmizlik idarəsinin rəisi Əli Ağamirovun aia.az-a bildirdiyinə görə, qarşıdan gələn yay mövsümündə mingəçevirlilərin və şəhərin qonaqlarının mənalı istirahətlərinin təşkili üçün rəhbərlik etdiyi kollektivin hər bir üzvü ürəkdən çalışır, işin ahəngdar getməsi üçün bütün imkanlardan maksimum istifadə edirlər.
Qeyd edək ki, işlərin sürətli, ən əsası, keyfiyyətli görülməsi üçün maşın və texnikalardan da istifadə olunur. Toplanan məişət tullantıları xüsusi texnikalar vasitəsi ilə daşınaraq zərərsizləşdirlir. Briqadirlər, bağbanlar, təmizlikçilər, ümumiyyətlə, bütün işçilər sübh tezdən işə başlayaraq üzərlərinə düşən vəzifəni məsuliyyətlə yerinə yetirir, sakinlərin istirahəti üçün yaradılan məkanlarda gözəl şəraitin salınması məqsədi ilə ürəkdən çalışırlar.
Azər Tağızadə
Geri dön