Kross qaçışı üzrə Azərbaycan yaz çempionatı
18-04-2023, 11:17. Yazar: sevinc1
Gənclər və İdman Nazirliyinin, Azərbaycan Atletika Federasiyasının təşkilatçılığı ilə Kross qaçışı üzrə Azərbaycan yaz çempionatı keçirilib. Lənkəran Olimpiya İdman Kompleksində baş tutan möhtəşəm idman tədbirinin rəsmi hissəsində ön sözlə çıxış edən Lənkəran Şəhər İcra Hakimiyyətinin başçısı Taleh Qaraşov Federasiyanın yeni rəhbərliyinin fəaliyyətinə uğurlar arzulayaraq bildirib ki, , bölgələrdə kütləvi idman yarışlarının keçirilməsi gənc nəslin sağlam ruhda böyüməsi baxımından xüsusi əhəmiyyət daşıyır. Ulu Öndər Heydər Əliyevin əsasını qoyduğu uğurlu idman siyasəti bu gün cənab Prezident İlham Əliyev və Birinci vitse-prezident Mehriban xanım Əliyeva tərəfindən layiqincə davam etdirilir, ən əsası bu sahəyə xüsusi diqqət göstərilməsi dövlətin prioritet məsələsi hesab olunur.
Azərbaycan Respublikası Rəqəmsal İnkişaf və Nəqliyyat nazirinin müavini, Azərbaycan Atletika Federasiyası İctimai Birliyinin Prezidenti Cavid Qurbanov çıxışında deyib: - “Heydər Əliyev İli” çərçivəsində baş tutan kütləvi idman tədbiri gənclərin idmana olan marağına bir maraqda qatır. Keçirilən yarışlar idmançıların dərəcələrini daha da artması, beynəlxalq yarışlarda iştiraka vəsiqə qazanması, eləcə bütövlükdə bölgələrdə idmanın inkişafı və gənclərin idmana təşviqi baxımından böyük önəm kəsb edir.
Azərbaycan Respublikası Gənclər və İdman Nazirliyinin sektor müdiri Sevda Mirzəyeva isə yarış iştirakçılarına uğurlar və güclünün qalib olmasını arzulayıb.
Azərbaycan Respublikasının Dövlət Himni oxunub, sonra iştirakçılar və hakimlər yarış məkanına yola düşüblər. Yarışa 11 komanda( Bakı, Naxçıvan, Gəncə, Bərdə, İsmayıllı, Xızı, Lənkəran, Astara, Təhsil - RİM, Təhsil 1 və Təhsil 5) və 170 idmançı qatılıb. Yarışı izləməyə gələnlər olduqca maraqlı bir idman yarışın şahidi olublar.
Yekunda qaliblər medal, Azərbaycan Atletika Federasiyasının, Gənclər və İdman Nazirliyinin hədiyyələri, həm də pul mükafatları ilə təltif ediliblər.
Zəfər Orucoğlu,
Azərbaycan Jurnalistlər Birliyinin üzvü
Geri dön