Niyazi Bayramov ölkə kubokunun qalibi olmuş “Gəncə” Basketbol Klubunun üzvləri ilə görüşüb
3-04-2023, 18:58. Yazar: sevinc1
Gəncə şəhər İcra Hakimiyyətinin başçısı Niyazi Bayramov Azərbaycan Kubokunun qalibi olmuş “Gəncə” Basketbol Klubunun üzvləri ilə görüşüb.
aia.az bildirir ki, görüşdə Milli Məclisin üzvü Müşfiq Cəfərov, Gəncə şəhər Gənclər və İdman Baş idarəsi və İcra Hakimiyyəti Aparatının əməkdaşları, klubun məşqçiləri və üzvləri iştirak ediblər.
İcra başçısı Niyazi Bayramov Prezident İlham Əliyevin və 1-ci vitse-prezident Mehriban xanım Əliyevanın ölkədə idman sahəsinə göstərdiyi diqqət və qayğıdan danışıb. Şəhər rəhbəri ilk dəfə təşkil olunan yarışda komandanın qazandığı nailiyyəti yüksək qiymətləndirib və bunun Gəncə idmanı adına xüsusi uğur olduğunu vurğulayıb. Komandanı bu qələbə münasibətilə təbrik edən başçı onlara uğurlar arzulayıb.
Deputat Müşfiq Cəfərov basketbolun Nizami yurdunda futbol qədər sevildiyini, azarkeşlərin oyunlar zamanı tribunaları doldurduğunu qeyd edib.
“Gəncə” Basketbol Klubunun məşqçisi Rizvan Səfərov komandanın cari mövsümdə Azərbaycan çempionatında da uğurlu çıxış etdiyini bildirib. Əlavə edib ki, kubokdakı nəticəni çempionatda da təkrarlamaq arzusundadırlar.
Komandanın kapitanı Amil Həmzəyev ölkə kuboku uğrunda yarışın ilk dəfə keçirildiyini söyləyərək kubokun ilk sahibində həmişəlik qalacağını bildirib.
Sonda icra başçısı Niyazi Bayramova komandanın forması hədiyyə olunub. Şəhər rəhbəri klubun ev oyunlarına dəvət edilib.
Azər Tağızadə
aia.az
Geri dön