Dağlıq Qarabağ sözü artıq qüvvədən düşüb
21-02-2023, 08:59. Yazar: sevinc1
Tarixdə ilk dəfədir ki, Münxen Təhlükəsizlik Konfransı vasitəsilə Azərbaycanın, Ermənistanın və Gürcüstanın rəhbərləri eyni zamanda bir platformada görüşdülər.
Münxen Təhlükəsizlik Konfransı çərçivəsində “Dağları aşmaq? Cənubi Qafqazda təhlükəsizliyin qurulması” adlı plenar iclasda Prezident İlham Əliyev bir daha uzaqgörən və müdrik siyasətçi olduğunu nümayiş etdirdi. Dövlət başçısı plenar iclasda qeyd etdi ki, Azərbaycan xalqı müharibənin nə olduğunu, xalqlar üçün nə dərəcədə dağıntılar və əziyyətlər gətirdiyini bilir və buna görə Avrasiyada sülhün bərqərar olmasını istəyir. Hazırda Ermənistan ilə Azərbaycan arasında sülh sazişin üzərində işlər aparılır. Prezident vurğuladı ki, Azərbaycan və Ermənistan uzun müddət çəkmiş toqquşmadan uzaqlaşmanı nümayiş etdirməli, qarşılıqlı ədavət və düşmənçiliyə son qoymalıdırlar.
Dövlət başçısı eyni zamanda onu da bir daha vurğuladı ki, Dağlıq Qarabağ sözü artıq qüvvədən düşüb. Azərbaycanda Dağlıq Qarabağ kimi inzibati vahid yoxdur. Azərbaycanın suverenliyinə və Konstitusiyasına hörmət edilməlidir. Azərbaycanda erməni əhalinin olduğu Qarabağ rayonu var. Qarabağdakı erməni azlığın hüquqları və təhlükəsizliyi ilə bağlı müzakirələr aparılacaq. Azərbaycan erməni icmasının Qarabağda doğulmuş və bütün ömrü boyu orada yaşamış nümayəndələri ilə müzakirə etməyə hazırdır, Qarabağda Rusiyadan rəhbər mövqe tutmaq üçün ixrac edilmiş şəxslə yox. Rəsmi Bakı Qarabağdakı erməni icmasının nümayəndələri ilə praktiki təmaslara başlamağa hazırdır. Qarabağ erməniləri Azərbaycan vətəndaşlarıdır, azlıqdır. Azərbaycan çoxmillətli ölkədir və Azərbaycanda bütün azlıqlar mədəniyyət, dil, həmçinin təhlükəsizlik də daxil olmaqla, eyni hüquq və üstünlüklərdən faydalanırlar Beləliklə, Prezident İlham Əliyev Münxen Təhlükəsizlik Konfransı vasitəsiylə də Azərbaycanın haqlı və birmənalı mövqeyini beynəlxalq ictimaiyyətə çatdırdı.
Prezident İlham Əliyev Münxen Təhlükəsizlik Konfransı çərçivəsində keçirilən və Ermənistan Baş naziri Nikol Paşinyanın da iştirak etdiyi plenar iclasda Azərbaycan ekofəallarının Laçın-Xankəndi yolunda Şuşada keçirilən aksiyası ilə bağlı səsləndirilən ittihamların əsassız olduğunu sübut etdi. Dövlət başçısı nəzərə çatdırıb ki, dekabrın 12-dən bizim vətəndaş cəmiyyəti fəallarımız keçid məntəqəsinə gələndən indiyədək 2500-dən çox nəqliyyat vasitəsi, o cümlədən Rusiya sülhməramlılarının və Qırmızı Xaçın təmsilçilərinin yük avtomobilləri keçib. Qarabağdan 100 pasiyent müalicə üçün Qırmızı Xaç tərəfindən Ermənistana aparılıb. Əgər Qarabağdakı ermənilər bu yoldan istifadə etməyə çalışsalar, onları heç kim dayandırmayacaq. Beləliklə, Prezident İlham Əliyev Münxen Təhlükəsizlik Konfransı kimi mühüm platformada Azərbaycanın haqlı mövqeyi arqumentlərlə dünya ictimaiyyətini çatdıraraq Ermənistan və havadarlarının bu dövr ərzində apardıqları anti-Azərbaycan kampaniyasını bir daha ifşa etdi, rəsmi Bakının regionda sülh və inkişafı dəstəklədiyini ortaya qoydu.
Mayil Əliyev
YAP Cəbrayıl rayon təşkilatının partiya fəalı
Geri dön