Yeni ildən Mingəçevirdəki mənzilləri qənaətcil LED tipli lampalar işıqlandıracaq
5-12-2022, 09:51. Yazar: sevinc1
Avropa İttifaqı BMT İnkişaf Proqramı ilə əməkdaşlıq çərçivəsində Şərq Tərəfdaşlığı ölkələrinin bələdiyyələrində inklüziv iqtisadi artımı və innovasiyaları təşviq edir. 2021-ci ildə “İqtisadi inkişafı dəstəkləyən Bələdiyyə Sədrləri” təşəbbüsünün yeni mərhələsinə start verilib. Layihə çərçivəsində Şərq Tərəfdaşlığı ölkələrində yerli hakimiyyət orqanlarına ədalətli və yaşıl inkişaf istiqamətində köməklik göstəriləcək.
Layihədə iştirak edən və müsabiqənin qaliblərindən biri də Mingəçevir Bələdiyyəsidir. Artıq Bələdiyyə təqdim etdiyi layihənin icrasına başlamaq ərəfəsindədir. Layihənin icrasına kömək məqsədi ilə bu günlərdə BMT İnkişaf Proqramının Azərbaycan nümayəndəliyindən Mingəçevir Bələdiyyəsinə kompüter və texniki avadanlıqlar hədiyyə olunub. Hədiyyəni Mingəçevir Bələdiyyəsinin sədri Ramiz Əliyevə layihə rəhbəri Cavid Məmmədov təqdim edib.
Qeyd edək ki, Mingəçevir Bələdiyyəsinin qalib olduğu layihə “LED tipli lampalara keçid” adlanır. Layihədə başlıca məqsəd nur şəhəri olan Mingəçevirdəki evlərdə enerjiyə qənaətli, uzun ömrə, möhkəmliyə, kiçik ölçüyə, sürətli açılıb-bağlanma və ənənəvi işıq qaynaqları kimi bir sıra üstünlüklərə malik LED tipli lampaların tətbiqinə keçiddir.
Mingəçevir Bələdiyyəsinin Sosial-iqtisadi şöbəsinin müdiri, layihənin müəllifi və əlaqələndircisi Zahid Qasımlı aia.az-a bildirib ki, son illər dünyada LED tipli lampalar çox populyarlaşıb və bu da təsadüfi deyil. Bu lampalara keçid daha çox işıqlandırmaya və elektrik enerjisinə qənaət etmək imkanı yaradacaq: “LED lampaların ömrü daha uzundur. Bir lampa ən azı 3-4 il işləyir, közərmə lampalarını isə bir neçə aydan bir dəyişmək lazım gəlir. LED tipli işıq lampalarına keçməklə atmosferə atılan karbon qazının (CO2) miqdarını azaltmaqla yanaşı, enerjiyə əhəmiyyətli dərəcədə qənaət etmək mümkün olacaq”, deyə Z.Qasımlı bildirb.
Azər Tağızadə
aia.az
Geri dön