Müzəffər Azərbaycan Ordusu İkinci Qarabağ Müharibəsində Qələbə çalmaqla öz gücünü bütün dünyaya göstərdi.
16-11-2022, 10:28. Yazar: sevinc1
Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyev, Zəfər Günü münasibətilə Şuşada təşkil olunan tədbirdə çıxışı çox mühüm əhəmiyyət kəsb edir.
Burada bir mühüm məqamı da vurğulamaq lazımdır ki, Ermənistan Azərbaycanın qədim musiqi və mədəniyyət mərkəzi olan Şuşa şəhərini ələ keçirməklə Ermənistan ordusu tərəfindən bütün Yuxarı Qarabağ zəbt olunmuşdu. Qeyd edək ki, Ermənilərin təcavüzü nəticəsində Şuşanın 25 məktəbi, 31 kitabxanası, 17 klubu, 8 mədəniyyət evi, 4 texnikumu, 2 institut filialı, 7 uşaq bağçası, 4 kinoteatrı, 5 mədəniyyət və istirahət parkı, 2 sanatoriya, turist bazası, 2 mehmanxanası, Azərbaycan Xalçası Dövlət Muzeyinin filialı, Şuşa Dövlət Dram Teatrı, Şuşa Televiziyası, Şərq musiqi alətləri fabriki, Dövlət Rəsm Qalereyası, Uşaq sağlamlıq məktəbi talan edilib, yandırılıb və dağıdılıb.
Alınmaz qala sayılan Şuşanı iki il bundan əvvəl erməni işğalından azad edən Azərbaycan Silahlı Qüvvələri şanlı tarix yazdı. Bu şanlı tarix bizimlə əbədi olacaq. Azərbaycan xalqı, gələcək nəsillər bu şanlı Qələbə ilə haqlı olaraq fəxr edəcəklər. Biz yaxşı bilirdik ki, Şuşa həqiqətən alınmaz qala sayılırdı. Şuşanı qəhrəman hərbçilərimiz azad edəndə onlar ölümə getiklərini gözə almışdılar.
Biz fəxr hissi ilə qeyd edə bilərik ki ,Azərbaycan hər zaman qəhrəman oğullar, igidlər və cəsurlar yurdu olub. Şuşanın işğaldan azad olunmasında mənfur düşmənə ağır zərbələr endirərək, onları əzəli torpaqlarımızdan qovan rəşadətli ordumuz bütün dünyaya öz gücünü sübut etdi .
Şuşaya gedən yol 27 sentyabr tarixində başlayıb. Müharibənin ilk günündən son gününə qədər Azərbaycan Silahlı Qüvvələri yalnız irəli getdi və 44 gün ərzində bir gün də geri addım atmadı . Halbuki, biz dünya hərb tarixindən bilirik ki, belə çətin müharibələrdə, xüsusilə bizim üçün əlverişsiz relyef şəraitində gedən müharibələrdə manevrlər də olur, geriyə addımlar da olur və gözlənilməz hadisələr də olur. Buna baxmayaraq bizi Qələbəyə aparan güclü iradə idi, Vətən sevgisi idi, hərbçilərimizin peşəkarlığı idi. Sentyabrın 27-də müharibənin birinci günündə altı kənd azad olunanda Azərbaycan xalqı daha da inandı ki, biz istədiyimizə nail olacağıq, tarixi missiyamızı yerinə yetirəcəyik.
Müharibənin ilk günlərindən Ermənistan təşviş içində idi, bəzi hallarda panikaya qapılırdı. Ermənistan ordusunda 10 mindən çox fərari olmuşdur, onların özlərinin etirafıdır. Azərbaycan Ordusunda bir nəfər də olsun fərari olmamışdır. Bu, xalqımızın yüksək mənəvi keyfiyyətlərindən xəbər verirdi. Bu, xalqımızın qəhrəmanlığıdır.
Cənab Prezident öz çıxışında qeyd etmişdir ki “Bizim vətənpərvərlik məsələləri ilə bağlı çox fəal siyasətimiz olmuşdur. Gənc nəsli vətənpərvərlik ruhunda tərbiyə etmək Prezident kimi mənim siyasətimin əsas istiqamətlərindən biri idi və buna nail olduq. Gənclərimiz vətənpərvərdir, Vətənə bağlıdır və İkinci Qarabağ müharibəsi bunu göstərdi. Bir daha demək istəyirəm, heç vaxt Qarabağı görməyən gənclərimiz Qarabağ uğrunda ölümə getməyə hazır idilər və ölümə gedirdilər, cəmiyyətdə milli birlik, milli həmrəylik ideyaları üstünlük təşkil etdi. Mən dəfələrlə deyirdim, bu gün də deyirəm, biz böyük ailəyik. Azərbaycanda yaşayan bütün xalqlar bir böyük ailənin üzvləridir. Yaxşı günlərdə, ağır günlərdə bir yerdəyik və bu birlik dünya miqyasında nadir dəyərdir”.
Eyni zamanda onuda dünyaya çatdırmaq istəmişik ki, biz hər zaman sülh istəyirik, biz müharibə istəmirik. Sülh, amma ədalətli sülh. İrəli sürdüyümüz şərtlər ədalətlidir, beynəlxalq hüquqa əsaslanır və sülh müqaviləsi bu şərtlər əsasında imzalanmalıdır.
Həm bizim güclü iradəmiz, həm də Vətən müharibəsindəki Qələbəmiz bizim hərbi gücümüzü bir daha açıq şəkildə dünyaya göstərdi! Bu Qələbə imkan verir ki, biz bu sözləri hamının üzünə, bizə xor baxanların gözünə deyək. Bu Qələbə, bu Zəfər bizə bu imkanı verdi, bütün xalqımıza inam verdi, ruh verdi. Biz təkcə ərazi bütövlüyümüzü yox, milli qürurumuzu bərpa etdik.
Eşqin QULİYEV,
YAP Göygöl rayon təşkilatı üzrə Hacıməlik qəsəbə ərazi partiya təşkilatının sədr müavini
Geri dön