Avarçəkənlərimizin Neftçalada təlim-məşq toplanışı keçirilir
9-09-2022, 16:44. Yazar: admen
Azərbaycan Kanoe və Avarçəkmə Federasiyası (AKAF) Neftçala rayonunda avarçəkənlərin təlim-məşq toplanışını keçirir.
AİA.Az xəbər verir ki, sentyabrın 9-da keçirilən toplanış Neftçalada Axmaz göl su hövzəsində təşkil olunur.
Əvvəlcə rayon icra hakimiyyətinin başçısı Mirhəsən Seyidov çıxış edərək iştirakçıları salamlayıb. O bildirib ki, Mingəçevirdən sonra Neftçalada belə hazırlıq prosesinin keçirilməsi rayonun önəmini əks etdirir. Qeyd edib ki, Neftçalada hələ sovet vaxtında avarçəkmə üzrə yarışlar keçirilib. Rayonda bu idman növünün təşkili üçün münbit şərait var. Ənənənin qorunub saxlanması müsbət amildir.
Gənclər və İdman Nazirliyinin İdman şöbəsinin müdiri Elnur Məmmədov deyib ki, Mingəçevir şəhərində doğulduğundan vaxtı ilə bu idman növü ilə məşğul olub və birgə avar çəkdiyi şəxs indi federasiyada məşqçi işləyir.
AKAF-in baş katibi Fərhad Əliyev isə bu toplanışı keçirməkdə məqsədin rayonlarda bu idman növünə kütləviliyi artırmaq olduğunu diqqətə çatdırıb.
Sonra toplanışa Axmaz göl su hövzəsində start verilib.
Təlim məşq-prosesində avarçəkmə üzrə milli komandanın Bakıdan və Mingəçevirdən olan üzvləri iştirak ediblər.
Qeyd edək ki, AKAF yaxın gələcəkdə ölkə ərazisində avarçəkmə üçün əlverişli olan bir neçə su hövzəsində belə tədbirlər keçirməyi planlaşdırır.
Geri dön