Koronavirusun hazırkı dalğası sönür: Yeni dalğa ola bilərmi? - AÇIQLAMA
6-10-2021, 15:40. Yazar: sevinc1
Koronavirusun hər bir dalğasının başlanğıcı olduğu kimi, sonu da var və 6 həftəlik proseslərdən sonra gedişat sönməyə başlayır. Bu gün ölkəmizdə növbəti dalğanın sönməsi hər birimizi sevindirir.
Bunu Milli Məclisin Səhiyyə komitəsinin sədr müavini Rəşad Mahmudov deyib.
Deputat bildirib ki, xəstəxanalarda xəstə yükü azalmağa başlayıb, günlük ölüm sayları getdikcə azalır: “Amma unutmamaq lazımdır ki, pandemiya davam etdiyi müddət ərzində hər ölkədə bəlli aralıqlarla növbəti dalğalar olacaq və payız aylarında qripal infeksiyaların çoxalması gözləniləndir. Arzu etməsək də, növbəti dalğanın noyabr-dekabr aylarında olma ehtimalı var.
Bunu nəzərə almamaq və ya buna qarşı əks fikrə düşmək sadəlövhlük olar. Bunu nəzərə almaq həm də ona görə lazımdır ki, indidən peyvənd olunmayanlar zamanında peyvənd olunsunlar ki, peyvənd olunduqdan sonra istənilən bir dalğa qarşısında yoluxsalar belə, qorxmadan evlərində sadə üsullarla, evlərdə hər hansı bir təhlükəli dərman istifadə etmədən bu xəstəliklə mübarizəni stressiz bir şəkildə həyata keçirə bilsinlər. Hər birimizə bu xəstəliklərdən uzaq, sağlam və təhlükəsiz həyat arzulayıram”.
Qeyd edək ki, son sutkada Azərbaycanda koronavirus infeksiyasına 826 yeni yoluxma faktı qeydə alınıb, 1 597 nəfər müalicə olunaraq sağalıb. İndiyədək ölkədə ümumilikdə 487 204 nəfərin koronavirus infeksiyasına yoluxması faktı müəyyən edilib, onlardan 467 043 nəfər müalicə olunaraq sağalıb, 6 599 nəfər vəfat edib, aktiv xəstə sayı 13 562 nəfərdir.
AİA.Az
Geri dön