Lənkəranda sahibkarlığa dəstək layihəsi çərçivəsində onlayn tədbir keçirilib
5-05-2021, 16:22. Yazar: sevinc1
Gənclər və İdman Nazirliyi, Ekologiya və Təbii Sərvətlər Nazirliyi, Aqrar Kredit və İnkişaf Agentliyinin dövlət dəstəyi, “Global Water Challenge” və “Coca-Cola” Fondunun nəzdində fəaliyyət göstərən “New World” Proqramın maliyyə dəstəyi və “Youth Inc.” Sahibkarlıq Proqramının təşkilatçılığı ilə ölkəmizdə “From Start to Smart” sahibkarlığa dəstək layihəsi həyata keçirilir.
Layihə çərçivəsində Lənkəran Şəhər Gənclər və İdman idarəsinin və “Youth Inc.” Sahibkarlıq Proqramının birgə təşkilatçılığı ilə onlayn tədbir keçirilib.
Onlayn tədbirdə Lənkəran Şəhər Gənclər və İdman İdarəsinin əməkdaşları və könüllü gəncləri, Lənkəran Dövlət Universitetinin nəzdində Sosial və Aqrar-Texnoloji Kollecin müəllim və tələbələri, Lənkəran Tibb Kollecinin tələbələri, GİKM Lənkəran nümayəndəliyinin könüllüləri və 1 nömrəli ərazi üzrə Ekologiya və Təbii Sərvətlər Şöbəsinin əməkdaşı iştirak ediblər.
Tədbir iştirakçılarına layihə barədə ətraflı məlumat verilib və gəncləri maraqlandıran suallar cavablandırılıb.
Qeyd edək ki, “From Start to Smart” sahibkarlığa dəstək layihəsi 9 aylıq müddəti əhatə edən, sahibkarlığın, startapların inkişafına yönələn və mövcud su problemlərinin innovativ həllinə istiqamətlənən dörd mərhələli layihədir.
#İdeyaGenerasiyası, #Preinkubasiya, #İnkubasiya və #Final mərhələlərindən ibarət layihə müddətində ideyaların yaradılması, həmin ideyalar əsasında prototipin ərsəyə gəlməsi və sonda investisiya əldə etmək imkanları layihənin əsas hədəfləridir.
Sahibkarlıq və startaplar haqda məlumatlılığın və fəaliyyətin artırılması, Azərbaycanda su ehtiyatlarının düzgün idarə olunmasının vacibliyinin çatdırılması, regionlarda mövcud su problemlərinə innovativ həll yollarının tapılması və yeni iş imkanlarının yaradılması layihənin əsas istiqamətlərini təşkil edir.
Layihədə iştirak etmək istəyənlər qeydiyyatdan keçmək üçün aşağıdakı linkə keçid ala bilərlər: https://starttosmart.youthinc.az
AİA.Az
Geri dön