Corat –sosial-iqtisadi inkişaf istiqamətində işlər davam edir
10-02-2021, 16:35. Yazar: sevinc1
Sumqayıt Şəhər İcra Hakimiyyəti başçısının Corat qəsəbəsi üzrə nümayəndəliyinin fəaliyyəti yüksək səmərəliliyi ilə seçilir
Etiraf etmək lazımdır ki, bu gün Sumqayıt şəhərində gedən inkişaf, həyata keçirilən irimiqyaslı sosial layihələr, insanların yaşam səviyyəsinin günü-gündən artması həqiqətən də yüksək dinamika almışdır. Bütün bunlar isə, əlbəttə ki, ilk növbədə dövlət tərəfindən regionlarımızın inkişafı üçün xüsusi olaraq tərtib olunan və uğurla həyata keçirilən uzunmüddətli inkişaf proqramlarının reallaşdırılması və eyni zamanda da bu layihələrin məhz yüksək səmərəliliklə icrasını təmin edən yerli hakimiyyət orqanlarının səyləri nəticəsində əldə olunur.
Tam səmimi olaraq deyə bilərik ki, bu gün Corat qəsəbəsinin sosial-iqtisadi inkişafı istiqamətində də mühüm işlər həyata keçirilməkdədir. O cümlədən qəsəbədə ötən il ərzində təmirə ehtiyacı olan tolların asfaltlanması, piyadalar üçün səkilər salınması, müasir işıq dirəklərinin quraşdırılması istiqamətində işlər uğurla davam etdirilib. Sakinlərin istirahəti üçün mini parklar salınıb, mövcud parklarda abadlıq və yaşıllaşdırma işləri həyata keçirilib. Kommunal xidmətlər sektorunda keyfiyyətin artırılması məqsədilə su kanalizasiya xətlərinin yenilənməsi, qəsəbədə elektrik enerji təminatının normallaşdırılması, qaz təminatının yaxşılaşdırılması istiqamətində mühüm işlər görülüb. Bütün bu işlərlə yanaşı qəsəbədə təhsil, idman və mədəniyyət sahələrinin inkişafı da diqqət mərkəzində saxlanılır.
Qeyd etmək lazımdır ki, bütün bu işlərin uğurla həyata keçirilməsində Sumqayıt Şəhər İcra Hakimiyyəti başçısının Corat qəsəbəsi üzrə nümayəndəsi Elvaris Əliyevin, eləcə də onun rəhbərlik etdiyi kollektivin böyük əməyi vardır. Bu xüsusda qəsəbədən əldə etdiyimiz məlumatlarda da vurğulanır ki, 2019-cu ilin noyabr ayından bu vəzifəyə təyin olunmuş Elvaris müəllim hər zaman Sumqayıt Şəhər İcra Hakimiyyətinin rəhbərliyi tərəfindən qarşıya qoyulmuş tapşırıqların icrasına böyük məsuliyyətlə yanaşan, bilavasitə sakinlər tərəfindən ona ünvanlanan müraciətlərdə qaldırılan məsələlərin həlli üçün bütün imkanlardan düzgün istifadə edə bilən bir insandır. Həmçinin açıqlamalarda bildirilir ki, vətəndaş məmnunluğuna nail olmaq məqsədilə Elvaris Əliyev rəhbərlik etdiyi qurumun da fəaliyyətini kifayət qədər səmərəli şəkildə qura bilmişdir. Son aldığımız məlumatlardan birində isə bildirilir ki, ötən ilin sonlarında Corat qəsəbə qəbristanlığında səhmanlama işləri həyata keçirilib. Qeyd edək ki,həmin ərazi çökəklik olduğuna görə illərdir ki, qurunt suaları ilə yararsız hala gətirilmiş vəziyyətdə idi. Dekabr ayında isə qəbristanlığın ərazisində Elvaris Əliyevin təşəbbüsü ilə abadlıq işləri aparılıb, əraziyə əlavə torpaq örtüyü verilərək istifadəyə yararlı hala gətirilib. Əlbəttə ki, bütün bu işlər Corat qəsəbə sakinləri tərəfindən yüksək qiymətləndirilir və onların məmnunluğuna səbəb olur.
Abbas Abbasov
Elbrus Bağırov
aia.az
Geri dön