Ruslar Qarabağda bizi dəstəkləyəcək?
6-07-2015, 12:50. Yazar: admin
Vladimir Pozner: Azərbaycan bizim üçün daha önəmlidir.
Rusiya üçün Azərbaycanla münasibətlər Ermənistanla münasibətlərdən daha önəmlidir. ANS PRESS-in məlumatına görə, bu fikri Rusiyanın tanınmış jurnalisti və teleaparıcısı Vladimir Pozner bildirib.
İrəvanda Rusiya şirkəti tərəfindən enerji tariflərinin qaldırılması əleyhinə başlanmış etiraz aksiyasına toxunan Pozner Ermənistanla Azərbaycan arasında yaşanan Dağlıq Qarabağ münaqişəsinə də toxunub. Pozner dolayısı ilə bu məsələdə Moskvanın Bakıya dəstək verməsinin vacibliyini vurğulayıb. “Siyasət soyuqbaşlı hesabat işidir, milli marağın bu baxımdan dəqiq hesablanmasıdır”,- deyə Pozner vurğulayıb.
Vladimir Pozner: "Ermənistanda daşlı torpaqdan başqa heç nə yoxdur"
Telejurnalist Rusiya maraqları baxımından Ermənistanla Azərbaycanı müqayisə edib: “Rusiya öz milli maraqlarını nəzərdən keçirir və bu, müxtəlif məsələlərlə bağlıdır. Ermənistana baxaq. Yoxsuldur - orda daşlı torpaqdan və ərikdən başqa heç nə yoxdur. Kiçikdir, əhalisi azdır. Azərbaycana da baxaq - zəngin neft ölkəsi açıq-aydın inkişaf edir. Üstəgəl, Türkiyə ilə çox sıx əlaqələri var. Türkiyə həddindən vacib ölkədir, NATO-nun üzvüdür. Ümumiyyətlə, Cənubda ən vacib ölkələrdən biridir”,- deyə Vladimir Pozner vurğulayıb.
Poznerin dediklərini bir sıra beynəlxalq qurumların proqnozları və ortaya çıxardıqları sosial göstəricilər də təsdiqləyir. Məsələn, Birləşmiş Millətlər Təşkilatı son 20 ildə Ermənistanda əhali sayının azalmasına diqqət yetirərək 2025-2030-cu illərə qədər bu ölkənin qeydiyyatında cəmi 1,5-2 milyon adam qalacağını vurğulayır. 2001-ci ildə bu rəqəm 3,8 milyona bərabər idi, hazırda 2,8 milyona düşüb.
“Gallup World” tərəfindən 2013-cü ildə aparılmış sosial sorğu nəticəsində məlum olub ki, Ermənistanın yetkinlik yaşına çatmış sakinlərinin 40 faizi bu ölkəni tərk etmək barədə düşünür. Ermənistan Sosioloqlar Assosiasiyasının həmin il apardığı sorğu zamanı aydın olub ki, rəyi soruşulanların 52,4%-i övladlarının Ermənistanda yox, xaricdə yaşamasını istəyirlər. Assosiasiyanın sədri Gevork Poqosyanın sözlərinə görə, öz ölkəsini tərk edən ermənilər dörd problemdən danışıblar. Onların fikrincə, ölkədə iş, perspektiv, ədalət və dolanışıq yoxdur.
Ermənistan Sosioloqlar Assosiasiyası: "Ermənilərin 52,4%-i övladlarının xaricdə yaşamasını istəyir"
Yəni bu baxımdan Rusiyanın təzadlı siyasətçilərindən biri olan və əzəl başdan Azərbaycana elə də ilıq münasibət nümayiş etdirməyən Vladimir Poznerin dediklərinə inanmaq olar. Yəni düşünmək olar ki, Ermənistanla münasibətlərin perspektivsizliyini anlayan Rusiya mövqeyində 180 dərəcə dəyişklik edərək Azərbaycanı dəstəkləmək qərarına gəlib.
Lakin azərbaycanlı politoloq, professor Fikrət Sadıqov ANS PRESS-in əməkdaşı ilə söhbəti zamanı bu cür bəyanatlara elə də aldanmamağa çağırıb.
“Reallıq budur ki, bu regionda və bütövlükdə beynəlxalq münasibətlər sistemində, xüsusilə də Rusiya üçün Azərbaycanın rolu artır. İstər energetika layihələri, istərsə də iqtisadi-siyasi münasibətlər baxımından Azərbaycan Rusiya üçün getdikcə daha artıq strateji əhəmiyyət kəsb etməyə başlayır. Bu, reallıqdır. Amma bununla yanaşı Rusiya Ermənistanı əlində saxlamalıdır. Çünki Rusiyanın bu ərazidə strateji maraqları var, NATO-nun üzvü olan Türkiyə amili var və s.”,- deyə Fikrət Sadıqov ANS PRESS-ə bildirib.
Professor Fikrət Sadıqov: "Hadisələrə öz maraqlarımız prizmasından yanaşmalıyıq”
Politoloq son dövrdə təkcə Poznerin deyil, Rusiyanın Azərbaycandan çox uzaq olan bir çox siyasətçilərinin Bakı ilə münasibətləri yaxşılaşdırmağın vacibliyini vurğuladığını xatırladıb.
“Daha öncə, Jirinovski və Züqanov da belə fikirlər irəli sürmüşdülər. Çünki Rusiya Qərb münasibətlərinin kəskinləşdiyi bir məqamda Moskva Bakı ilə münasibətləri yaxşılaşdırmağa maraqlıdır. Amma bu bizi arxayın salmalı deyil. Bizim də öz maraqlarımız var və hadisələrə öz maraqlarımız prizmasından yanaşmalıyıq”,- deyə professor Fikrət Sadıqov vurğulayıb.
Geri dön