Sahibkarlar texnika və avadanlıqlar üçün gömrük rüsumu ödəməyəcək
19-01-2016, 16:26. Yazar: admin
Qanun layihəsi qəbul edildi.
Milli Məclisin bu gün keçirilən növbədənkənar iclasında “Gömrük tarifi haqqında” qanuna dəyişikliklər edilməsi barədə qanun layihəsini qəbul edilib.
Qərarə əsasən, Azərbaycan iqtisadiyyatının prioritet sahələrinə investisiya yatıranlar 7 illik gömrük rüsumundan azad edilir.
Azərbaycana idxal olunan bir sıra texnika, avadanlıq və qurğular gömrük rüsumundan azad edilir.
Aia.az “Report”-a istinadən xəbər verir ki, bu barədə “Gömrük tarifi haqqında” dəyişikliklər edilməsi planlaşdırılır.
Dəyişiklik layihəsi parlamentə Azərbaycan Prezidentinin imzası ilə daxil olub.
Layihəyə əsasən, müvafiq icra hakimiyyəti orqanının müəyyən etdiyi meyarlara uyğun olaraq ölkə iqtisadiyyatı üzrə prioritet hesab olunan sahələrdə investisiya fəaliyyəti həyata keçirən hüquqi şəxslər və fərdi sahibkar tərəfindən investisiya təşviqi sənədi aldıqları andan müvafiq icra hakimiyyəti orqanının təsdiqedici sənədi əsasında idxal etdikləri texnika, texnoloji avadanlıqlar və qurğular - 7 il müddətinə gömrük rüsumundan azad ediləcək.
Həmçinin, müvafiq icra hakimiyyəti orqanının qərarına əsasən yaradılan sənaye, yaxud texnologiyalar parklarının infrastrukturunun, istehsal sahələrinin yaradılması və tikintisi, habelə elmi-tədqiqat və təcrübə-konstruktor işlərinin görülməsi məqsədi ilə sənaye, yaxud texnologiyalar parklarının idarəedici təşkilatı və ya operatoru tərəfindən müvafiq icra hakimiyyəti orqanının təsdiqedici sənədi əsasında texnikanın, texnoloji avadanlıqların və qurğuların idxalı; müvafiq icra hakimiyyəti orqanının qərarına əsasən yaradılan sənaye, yaxud texnologiyalar parklarında istehsal sahələrinin tikintisi, elmi-tədqiqat və təcrübə-konstruktor işlərinin görülməsi və istehsal məqsədi ilə sənaye, yaxud texnologiyalar parklarının rezidenti olan hüquqi şəxslər və fərdi sahibkar tərəfindən müvafiq icra hakimiyyəti orqanının təsdiqedici sənədi əsasında idxal olunan texnikanın, texnoloji avadanlıqların və qurğuların idxalı - rezidentin sənaye, yaxud texnologiyalar parklarında qeydiyyata alındığı tarixdən 7 il müddətinə gömrük rüsumundan azad edilir.
Qeyd edək ki, layihə Milli Məclisin İqtisadi siyasət, sənaye və sahibkarlıq komitəsinin və Hüquq siyasəti və dövlət quruculuğu komitəsinin birgə iclasında müzakirə edilərək parlamentin plenar sessiyasına tövsiyə olunub.
Geri dön