Problemli kreditlər həll olundu –
7-05-2019, 13:19. Yazar: sevinc1
Prezident İlham Əliyevin “Fiziki şəxslərin problemli kreditlərinin həlli ilə bağlı əlavə tədbirlər haqqında” Fərmanından sonra 602.347 nəfər şəxs kompensasiya almaq hüququ qazanıb.
İllərdir vətəndaşları narahat edən məsələ həll olunub. Məlumdur ki, bəzi vətəndaşlar məhz mənfi kredit tarixçəsinə görə yenidən kredit götürə bilmir. Maraqlıdır, illərdir kreditini ödəyə bilmədiyi üçün bankların “qara siyahı”sına düşən vətəndaşların kredit tarixçələri yenilənəcəkmi?
Məsələ ilə bağlı Modern.az-ın sualını Azərbaycan Banklar Assosiasiyasının (ABA) sədri Zakir Nuriyev cavablandırıb.
ABA sədri deyib ki, əgər müştərinin kompensasiya ödənişi yaxud restrukzasiya hesabına öz borclarına xidmət etmək vəziyyəti yaxşılaşırsa, bu məlumatlar banklar tərəfindən kredit bürolarına ötürülür:
“Vətəndaşın vaxtı keçmiş borcları var idisə, fərmanla ödəniş baş verdikdən sonra artıq onun kredit tarixçəsində vaxtı keçmiş borcu olduğu görünməyəcək. Yaxud krediti restruktrurizasiya olunubsa, o problemli kredit statusundan çıxır və normal kredit statusuna keçir. Bu statusa keçmək müvafiq olaraq kredit bürolarında öz əksini tapır”.
Z.Nuriyev bildirib ki, şəxsin keçmişdə hər hansı bir kredit borcu olubsa, özünün kredit tarixçəsinə düzgün xidmət etməyibsə, kredit bürolarında bu şəkildə qalacaq:
“Vətəndaş kredit aldığı zaman bunun nədən yarandığını, necə baş verdiyini banka təqdim edir. Amma bugünkü günə problemli kreditlərə görə kompensasiya almış müştərilərin kredit tarixçələrində onların borclarının olmadığı öz əksini tapır. Kreditləri restruktrurizasiya olunmuş müştərilər də yaxşılaşmış kredit tarixçələrinə sahibdirlər”.
aia.az
Geri dön