Çimərliklərdə boğulma hallarının artma səbəbləri açıqlandı
5-07-2017, 16:31. Yazar: admin
İyulun 5-nə qədər Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Xidmətinin əməkdaşları suda boğulma təhlükəsilə üzləşən 26 nəfəri xilas edib.
Bu barədə FHN-in Kiçikhəcmli Gəmilərə Nəzarət və Sularda Xilasetmə və dalğıc işləri şöbəsinin müdiri Elsevər Həsənov məlumat verib.
O qeyd edib ki, qeyri-çimərlik ərazilərində xilas edilənlərin sayı 4 nəfər olub:
“Ümumilikdə çimmək üçün müəyyən olunmuş ərazilərdə suda batma halı qeydə alınmayıb. Gündəlik kütləvi informasiya vasitələrində verilən suda batma hallarına gəlincə, onlar qeyri-çimərlik ərazilərində baş verib”.
E.Həsənov suda batma hallarının başvermə səbəblərinə də aydınlıq gətirib:
“Vətəndaşların küləkli hava şəraitində, günün qaranlıq saatlarında suya daxil olması, qeyri-çimərlik ərazilərdə çimmələri nəticəsində suda batma, boğulma halları baş verir”.
Qurum rəsmisi çimərliklərdə təhlükəsizlik qaydalarını da açıqlayıb:
Çimərlikdə təhlükəsizlik qaydaları
Çimərlikdə qadağandır:
- Çimmək üçün nəzərdə tutulmamış ərazilərdə çimmək!
- Çimmə zonasının işarələnmiş sərhədlərindən kənara üzmək!
- Küləkli havada dənizə girmək!
- Sərxoş halda çimərliyə gəlmək və ya burada spirtli içki qəbul etmək!
- Çimərlikdə gecələmək, fırtınanın yaxınlaşması xəbərdarlığından sonra çimərlik ərazisində qalmaq!
- Suda kobud hərəkətlər etmək!
- Çimərliyi məişət və digər tullantılarla zibilləmək!
- Çimərliyə ev heyvanlarını gətirmək!
- Çimərlikdə balıq tutmaq!
- Çimərlikdə müxtəlif növ gəmi, qayıq, sal, körpü, xəbərdarlıq nişanları, üzgəclər və digər texniki qurğulara üzüb yanaşmaq və üzərinə çıxmaq!
- Çimərlik ərazisinə xilasetmə texnikası istisna olmaqla digər qayıq və kiçik gəmilərin daxil olması!
Yadda saxlayın!
- Uşaqlar yalnız böyüklərin müşayiəti ilə çimərlikdən istifadə etməlidir!
- Uşaqlar çimərlikdə nəzarətsiz qoyulmamalıdır!
- Uşaqlar çimərlikdə yalnız onlar üçün ayrılmış yerlərdə çimməlidir!
- Xilasedicilərin çağırış və tələblərinə sözsüz əməl edilməlidir!
- Xəbərdaredici nişanların və lövhələrin tələblərinə əməl olunmalıdır!
- Günün qızmar saatlarında günəş altında fasiləsiz dayanmaq təhlükəlidir!
- Hava qaraldıqdan sonra suya daxil olmaq təhlükəlidir!
Çimərliklərdə istirahət saat 900-dan 2000-dək daha təhlükəsizdir!
AİA.az
Geri dön