Ana Sayfa > Özəl > ABŞ-da ardıcıl texniki nasazlıqlar – Rubio kiberhücum iddialarına aydınlıq gətirdi

ABŞ-da ardıcıl texniki nasazlıqlar – Rubio kiberhücum iddialarına aydınlıq gətirdi


Bu gün, 18:15. Yazar: vasif
ABŞ-da ardıcıl texniki nasazlıqlar – Rubio kiberhücum iddialarına aydınlıq gətirdi



ABŞ dövlət katibi Marko Rubio ölkədə dövlət qurumlarının və iri şirkətlərin informasiya sistemlərində baş verən texniki nasazlıqların əlaqələndirilmiş kiberhücumun nəticəsi olmadığını bildirib.

Rubio bu barədə Filippinin paytaxtı Manilada jurnalistlərin suallarını cavablandırarkən danışıb.

Onun sözlərinə görə, son dövrlərdə müxtəlif qurumların kompüter və rabitə sistemlərində qeydə alınan problemlər arasında hər hansı əlaqə müəyyən edilməyib.

“Biz sistemli hücumun qurbanı deyilik. Bu hadisələrin ortaq cəhəti yoxdur və onlar bir-biri ilə əlaqəli deyil”, – deyə ABŞ dövlət katibi vurğulayıb.

Rubio bildirib ki, mövcud məlumatlar hər bir texniki nasazlığın ayrıca səbəblərdən qaynaqlandığını göstərir. Onun sözlərinə görə, baş verən hadisələrin kibercinayətkarların, xarici dövlətlərin və ya digər zərərli qüvvələrin fəaliyyəti ilə əlaqəsi aşkarlanmayıb.

Dövlət katibi bununla belə, ABŞ-a qarşı kiberfəaliyyət həyata keçirməyə çalışan şəxslərin və qrupların mövcudluğunu istisna etməyib.

“Bu, digər ölkələrdə bizə zərər verməyə çalışan şəxslərin və ya cinayətkarların olmadığı anlamına gəlmir. Sadəcə, sözügedən hadisələrin onlarla əlaqəsi yoxdur. Amerikalılar buna əmin ola bilərlər”, – deyə Rubio qeyd edib.

Xatırladaq ki, daha əvvəl ABŞ Milli Təhlükəsizlik Agentliyinin qapalı daxili kompüter şəbəkəsində texniki xidmət zamanı müvəqqəti fasilə yaranmışdı.

Bundan başqa, ABŞ Federal Aviasiya Administrasiyasının hava hərəkətinin idarə edilməsi mərkəzlərində rabitə problemləri qeydə alınmışdı. Yayılan məlumata əsasən, həmin nasazlıqlar səbəbindən ölkə üzrə uçuşlar dörd saatdan artıq müddətə təxirə salınmışdı.

Texniki fasilələr yalnız dövlət qurumları ilə məhdudlaşmayıb. “Microsoft”, “United Airlines” və “JPMorgan Chase” kimi iri şirkətlərin sistemlərində də ciddi nasazlıqların baş verdiyi bildirilir.

ABŞ dövlət katibinin açıqlamasına əsasən, bu hadisələr arasında əlaqələndirilmiş kiberhücum əlamətləri müəyyən edilməyib və hər bir nasazlığın ayrıca texniki səbəbi olduğu qiymətləndirilir.
Geri dön