İsraildən Fransa siyasətçisinə sərt qərar – Melanşonun ölkəyə girişi qadağan edildi
Bu gün, 20:21. Yazar: vasif
İsrail hakimiyyəti Fransanın tanınmış solçu siyasətçisi, 2027-ci il prezident seçkilərində iştirak etmək niyyətində olan Jan-Lük Melanşonu “persona non qrata” elan edib. Onun İsrail ərazisinə girişinə qadağa qoyulub.
İsrail Xarici İşlər Nazirliyinin açıqlamasına əsasən, qərar təkcə “Təslim olmayan Fransa” siyasi hərəkatının lideri Melanşona deyil, partiyanın parlament fraksiyasının sədri Matilda Panoya da şamil edilib.
Nazirlik hər iki siyasətçinin İsrailə münasibətdə sərt mövqe nümayiş etdirdiyini və ölkə rəhbərliyini tənqid edən bəyanatlarla çıxış etdiyini bildirib.
Qərarın qəbul edilməsində Melanşonun Qəzza zolağına humanitar yardım aparan gəmilərlə bağlı son açıqlaması da rol oynayıb.
Fransalı siyasətçi bildirib ki, 2027-ci ildə keçiriləcək prezident seçkilərində qalib gələcəyi təqdirdə Qəzzaya istiqamətlənən humanitar flotiliyaların təhlükəsizliyini təmin etmək üçün Fransa hərbi dəniz qüvvələrindən istifadə edəcək.
Bu bəyanat İsrail hakimiyyətinin narazılığına səbəb olub.
İsrail Xarici İşlər Nazirliyi giriş qadağasının xarici işlər naziri Gideon Saar və ölkənin daxili işlər naziri tərəfindən qəbul edildiyini açıqlayıb.
Beləliklə, Melanşonun Qəzza ilə bağlı mövqeyi Fransa siyasətçisi ilə İsrail hakimiyyəti arasında yeni diplomatik gərginlik mövzusuna çevrilib.
Geri dön