Moskvadan Ermənistana xəbərdarlıq: “KTMT-dən çıxarsa, çox şey itirəcək”
Bu gün, 20:00. Yazar: vasif
Rusiya Federasiya Şurasının sədri Valentina Matviyenko Ermənistanın Kollektiv Təhlükəsizlik Müqaviləsi Təşkilatından (KTMT) mümkün ayrılması ilə bağlı İrəvana xəbərdarlıq edib.
Matviyenko bildirib ki, Ermənistanın təşkilatda üzvlüyünü davam etdirib-etdirməməsi ölkənin müstəqil qərarıdır. Bununla belə, o, KTMT-dən çıxmağın İrəvan üçün ciddi itkilərlə nəticələnə biləcəyini vurğulayıb.
“KTMT-dəki üzvlüyünü davam etdirib-etdirməmək Ermənistanın öz səlahiyyətində olan məsələdir. Hesab edirəm ki, əgər Ermənistan digər yolu seçərsə, çox şey itirəcək”, – deyə Matviyenko bildirib.
Rusiya rəsmisi bu açıqlamanı Vyetnama səfərinin yekunlarına dair jurnalistlərin suallarını cavablandırarkən verib.
Matviyenkonun sözləri Moskvanın Ermənistanın KTMT-dən mümkün ayrılmasına mənfi münasibətini bir daha ortaya qoyur.
Bununla belə, Rusiya Federasiya Şurasının sədri Ermənistanın təşkilatdan çıxacağı təqdirdə konkret hansı itkilərlə üzləşəcəyini açıqlamayıb.
Geri dön