Səhər yeməyində iki yumurta yemək kimlər üçün risklidir? – Həkim açıqladı
Bu gün, 18:39. Yazar: vasif
Səhər yeməyində iki yumurta qəbul etmək hər kəs üçün eyni dərəcədə uyğun olmaya bilər. Xüsusilə qanda “pis” xolesterini yüksək olan və ürək-damar xəstəliklərindən əziyyət çəkən şəxslər qidalanmalarına diqqət yetirməlidirlər.
Bu barədə qastroenteroloq, tibb elmləri namizədi Yevgeni Belousov “Gazeta.Ru”ya açıqlamasında danışıb.
Həkimin sözlərinə görə, yumurta zülal, vitamin və minerallarla zəngin faydalı qida məhsuludur. Lakin onun sağlamlığa təsiri hazırlanma üsulundan və hansı məhsullarla birlikdə yeyilməsindən də asılıdır.
Mütəxəssis bildirib ki, yumurtanı çoxlu kərə yağında qızardaraq kolbasa və ya bekonla yemək ürək-damar xəstəlikləri baxımından əlavə risk yarada bilər. Çünki bu məhsullarda doymuş yağların miqdarı yüksəkdir və onların həddindən artıq qəbulu qanda “pis” xolesterinin artmasına səbəb ola bilər.
Belousov qeyd edib ki, bir yumurtanın sarısında təxminən 200 milliqram xolesterin mövcuddur. Buna görə də lipid mübadiləsi pozulmuş şəxslərin yumurta istehlakını fərdi sağlamlıq göstəricilərinə uyğun tənzimləməsi vacibdir.
Həkim yumurtadan tamamilə imtina etməyin zəruri olmadığını da vurğulayıb. Onun sözlərinə görə, sağlam insanlar balanslaşdırılmış qidalanma çərçivəsində gündə bir yumurta qəbul edə bilərlər.
Mütəxəssis yumurtanın tərəvəz və tam taxıllı çörəklə birlikdə yeyilməsini daha münasib seçim kimi göstərib.
Belousov əlavə edib ki, yumurtanın toxluq hissini nə qədər davam etdirməsi porsiyanın ölçüsündən, zülal və lif miqdarından, həmçinin insanın fərdi xüsusiyyətlərindən asılıdır.
Ürək-damar xəstəliyi və yüksək xolesterin problemi olan şəxslərə isə gündəlik yumurta miqdarını həkimlə məsləhətləşərək müəyyənləşdirmək tövsiyə olunur.
Geri dön