Netanyahu İrana hücuma hazırlaşır? – İsrailin keçmiş baş nazirindən ciddi ittiham
Bu gün, 22:00. Yazar: vasif
İsrailin keçmiş baş naziri Ehud Barak ölkənin hazırkı hökumət rəhbəri Benyamin Netanyahu ilə bağlı diqqətçəkən iddia irəli sürüb.
İsrailin 12-ci televiziya kanalının yaydığı məlumata görə, Barak Netanyahunun ölkədə yeni hökumətin formalaşmasının qarşısını almaq məqsədilə İrana qarşı hərbi əməliyyatlara başlaya biləcəyini iddia edib.
“Netanyahu başqa bir hökumətin formalaşmasının qarşısını almaq üçün İrana hücum edə bilər”, – deyə keçmiş baş nazir bildirib.
Ehud Barak bununla kifayətlənməyərək İsrailin kəşfiyyat fəaliyyəti ilə bağlı da ciddi ittiham səsləndirib.
Onun iddiasına əsasən, Netanyahu İsrailin xarici kəşfiyyat xidməti olan “Mossad” vasitəsilə İran ərazisində təxribat xarakterli əməliyyat planlaşdırıb.
Barak bildirib ki, sözügedən plan barədə İsrail Silahlı Qüvvələrinin Baş Qərargah rəisinə əvvəlcədən məlumat verilməyib.
Keçmiş baş nazirin açıqlamaları İsraildə daxili siyasi proseslərlə İranla mümkün hərbi qarşıdurma arasında əlaqə barədə müzakirələrə səbəb ola bilər.
Bununla belə, Barakın irəli sürdüyü iddialar müstəqil şəkildə təsdiqlənməyib. Netanyahunun belə bir əməliyyat barədə qərar qəbul etdiyini göstərən rəsmi məlumat təqdim olunmayıb.
İsrail hökumətinin və “Mossad”ın sözügedən ittihamlara münasibəti barədə də məlumat verilməyib.
Geri dön