ABŞ-la İran arasında gizli danışıqlar üzə çıxdı – Məhkəmə sənədlərində diqqətçəkən detallar
Bu gün, 18:39. Yazar: vasif
ABŞ Prezidenti Donald Trampın administrasiyasının İran vətəndaşlarının deportasiyası ilə bağlı Tehranla birbaşa təmaslar apardığı məlum olub.
“Associated Press” agentliyinin məhkəmə sənədlərinə istinadən yaydığı məlumata görə, Vaşinqton və Tehran arasında danışıqlar iranlı miqrantların ABŞ-dan öz ölkələrinə qaytarılması məqsədilə aparılıb.
Məhkəmə materiallarında göstərilir ki, ABŞ hakimiyyət orqanları İran rəsmiləri ilə əlaqə saxlayaraq səyahət sənədlərinin hazırlanması və deportasiyanın mümkün yollarını müzakirə ediblər.
Oktyabrın ortalarında ABŞ administrasiyası bir qrup İran vətəndaşının üçüncü ölkə vasitəsilə İrana göndərilməsi planını açıqlayıb.
Lakin bu qərar məhkəmə mübahisəsinə səbəb olub. Federal hakim Ana Reyes deportasiya ilə bağlı qərarların təsdiqlənməsindən 24 saat əvvəl məhkəmənin məlumatlandırılmasını, deportasiyadan isə ən azı beş gün əvvəl yazılı bildiriş verilməsini tələb edib.
Hakim oktyabrın 15-də keçirilən iclasda insanların ABŞ prezidentinin düşmən dövlət kimi xarakterizə etdiyi İrana qaytarılmasının təhlükəsizlik baxımından ciddi risklər yarada biləcəyinə diqqət çəkib.
ABŞ hökumətinə qarşı ciddi ittiham
İranlıların hüquqlarını müdafiə edən təşkilatlar Tramp administrasiyasını sığınacaq istəyən şəxslərin məxfi məlumatlarını İran hakimiyyətinə ötürməkdə ittiham edirlər.
İddiaçıların fikrincə, belə məlumatların Tehrana verilməsi həmin şəxslərin İranda təqib olunması təhlükəsini artıra bilər.
ABŞ Daxili Təhlükəsizlik Nazirliyi isə sığınacaq müraciətlərinə aid sənədlərin İran hökumətinə ötürüldüyünü təkzib edib.
Ədliyyə Nazirliyinin sözçüsü Dimitar Georgiyev-Remel administrasiyanın deportasiya qərarlarını icra etmək niyyətində olduğunu təsdiqləyib.
Noyabrın 8-də yeni deportasiya mümkündür
Məhkəmə sənədlərinə əsasən, 2025-ci ilin sentyabr və dekabr aylarında, həmçinin 2026-cı ilin yanvarında ABŞ və İran yüzdən çox şəxsin geri qaytarılmasını təşkil edib.
Son bir həftədə isə ən azı 12 iranlıya yaxın zamanda deportasiya ediləcəkləri bildirilib. Bəzi şəxslərə uçuşun noyabrın 8-də həyata keçirilə biləcəyi barədə məlumat verilib.
Məsələ ilə əlaqədar “Iranian American Legal Defense Fund” və “Public Citizen Litigation Group” təşkilatları ABŞ hökumətinə qarşı məhkəmə iddiası qaldırıblar.
Qeyd edək ki, Tramp administrasiyası bundan əvvəl də bəzi miqrantları El Salvador, Kosta Rika və Panama kimi üçüncü ölkələrə göndərib.
Hazırda əsas mübahisə deportasiya ediləcək iranlıların təhlükəsizliyinin necə təmin olunacağı və onların şəxsi məlumatlarının İran hakimiyyətinə ötürülüb-ötürülmədiyi ilə bağlıdır.
Geri dön