Trampın komandasında İranla bağlı fikir ayrılığı – Kimlər müharibə, kimlər razılaşma istəyir?
Bu gün, 21:32. Yazar: vasif
ABŞ Prezidenti Donald Trampın administrasiyasında İrana qarşı növbəti addımlarla bağlı fikir ayrılıqlarının yarandığı bildirilir. Ağ Evə yaxın bəzi rəsmilər iqtisadi təzyiqlərin davam etdirilməsini, digərləri isə hərbi əməliyyatların bərpasını dəstəkləyirlər.
“Axios” portalının mənbələrə istinadən yaydığı məlumata görə, Mərkəzi Kəşfiyyat İdarəsinin direktoru Con Retkliff, dövlət katibi Marko Rubio və maliyyə naziri Skott Bessent İrana qarşı iqtisadi təzyiq siyasətinin davam etdirilməsinin tərəfdarıdırlar.
Mənbələrin iddiasına əsasən, Retkliff hesab edir ki, uzunmüddətli iqtisadi çətinliklər İranda daxili narazılığı artıra və Tehranı əlavə güzəştlərə məcbur edə bilər.
ABŞ-nin vitse-prezidenti Cey Di Vens və prezidentin xüsusi elçisi Stiv Uitkoff isə İranla diplomatik razılaşmanın əldə olunmasını dəstəkləyirlər.
Məlumata görə, Fars körfəzi ölkələrinin əksəriyyəti də hərbi qarşıdurma əvəzinə razılaşmaya üstünlük verdiklərini Tramp administrasiyasına çatdırıblar.
Hərbi əməliyyatların bərpasını kimlər istəyir?
“Axios”un yazdığına görə, İsrailin Baş naziri Benyamin Netanyahu və ABŞ-nin müdafiə naziri Pit Heqset İrana qarşı hərbi əməliyyatların yenidən başlanmasını zəruri hesab edirlər.
Onların mövqeyinə əsasən, Tehranla əldə olunacaq razılaşmanın etibarlılığı və İranın mümkün öhdəliklərinə əməl edəcəyi ciddi sual altındadır.
Donald Tramp isə daha əvvəl verdiyi açıqlamada İrana qarşı hücumların bərpası ilə bağlı qərar qəbul etməyə tələsmədiyini bildirib.
“Bu və ya digər şəkildə nəsə edəcəyik, amma tələsmək lazım deyil. Biz onlara maddi ziyan vurduq. Onların pulu, benzini qurtarıb və xalqı bundan çox bezib”, – deyə ABŞ Prezidenti söyləyib.
Beləliklə, Vaşinqtonda İranla bağlı iqtisadi təzyiq, diplomatik razılaşma və hərbi əməliyyat variantları ətrafında fərqli mövqelər mövcuddur. Hələlik ABŞ administrasiyasının növbəti addımı barədə yekun qərar açıqlanmayıb.
Geri dön