Süni intellekt şirkətlərin gözləntilərini doğrultmadı? – İşdən çıxarılan əməkdaşlar geri çağırılır
Bu gün, 19:00. Yazar: vasif
Dünyanın müxtəlif ölkələrində fəaliyyət göstərən bəzi şirkətlər süni intellektlə əvəz etdikləri əməkdaşları yenidən işə qəbul etməyə başlayıblar.
AP-nin məlumatına görə, bu tendensiya artıq “Süni intellekt bumeranqı” adlandırılır. Hadisənin nə qədər geniş yayıldığı hələ tam müəyyən edilməsə də, oxşar halların getdikcə daha çox müşahidə olunduğu bildirilir.
Şirkətlərin bəzi vəzifələri süni intellektə həvalə etdikdən sonra insan əməyinin əhəmiyyətini yenidən qiymətləndirdiyi qeyd olunur.
Xüsusilə tənqidi düşüncə, yaradıcı yanaşma, komanda ilə əməkdaşlıq və təşkilatın daxili iş prinsiplərini dərindən anlamaq tələb olunan sahələrdə insan faktorunun vacibliyi ön plana çıxır.
“Robert Half” şirkətinin regional direktoru Bill Driskoll bildirib ki, süni intellektin imkanlarına baxmayaraq, müəyyən bacarıqları insan səviyyəsində əvəz etmək hələ də çətindir.
Onun sözlərinə görə, şirkətlər artıq bəzi işlərin effektiv yerinə yetirilməsi üçün insan əməkdaşlara ehtiyac olduğunu anlamağa başlayırlar.
Beləliklə, süni intellektin sürətlə tətbiqi əmək bazarında yalnız ixtisarlara deyil, bəzi hallarda işdən çıxarılan əməkdaşların geri qaytarılmasına da səbəb olur. Bununla belə, tendensiyanın qlobal əmək bazarına ümumi təsirini qiymətləndirmək üçün hələ kifayət qədər məlumat yoxdur.
Geri dön