Yəməndə genişmiqyaslı hərbi əməliyyat – 24 saatda 500 döyüşçünün öldürüldüyü bildirildi
Bu gün, 18:16. Yazar: vasif
Yəməndə hökumət qüvvələri ilə husilər arasında hərbi əməliyyatlar davam edir. Son sutka ərzində keçirilən əməliyyatlarda yüzlərlə döyüşçünün öldürüldüyü və çoxsaylı hərbi texnikanın məhv edildiyi açıqlanıb.
Yəmən ordusunun sözçüsü, polkovnik Məcid Abdullah ən-Nazilinin məlumatına görə, “Yəmən Şəfəqi” kampaniyası çərçivəsində son 24 saatda 1272 hərbi əməliyyat həyata keçirilib. Nəticədə təxminən 500 husi döyüşçüsünün öldürüldüyü iddia olunur.
Ordunun açıqlamasına əsasən, zərbələr husilərin toplaşma məntəqələrinə, müdafiə istehkamlarına, atəş mövqelərinə və təchizat vasitələrinə endirilib. 169 nəqliyyat vasitəsi, hərbi avadanlıq və ağır silahın məhv edildiyi və ya yararsız vəziyyətə salındığı bildirilir.
Hökumət qüvvələrinin əl-Cəvf, Mərib, əl-Bayda, Lahic və Taiz əyalətlərində irəlilədiyi qeyd olunur. Əməliyyatlar zamanı hava zərbələri və artilleriya dəstəyindən istifadə edilir.
Əl-Cəvf əyalətində strateji əhəmiyyət daşıyan Huveyşiyan dağlarının nəzarətə götürüldüyü də açıqlanıb. Bu ərazi husilərin nəzarətində olan əl-Həzm şəhərinin müdafiə xəttinin bir hissəsi hesab edilir.
Qeyd edək ki, Yəmən Prezident Şurasının rəhbəri Rəşad əl-Üleyminin elan etdiyi “Yəmən Şəfəqi” əməliyyatı oktyabrın 5-dən davam edir. Kampaniyanın məqsədi husilərin nəzarətindəki dövlət qurumlarını geri almaq və paytaxt Sənaya nəzarəti bərpa etməkdir.
Hökumət qüvvələrinin açıqladığı itki sayı və döyüş meydanındakı nəticələr müstəqil mənbələr tərəfindən təsdiqlənməyib.
Geri dön