Uşaqlarda xoruldama hansı xəstəliklərin əlaməti ola bilər? –
Bu gün, 20:36. Yazar: vasif
Xoruldama yalnız böyüklərdə deyil, uşaqlarda da müşahidə oluna bilər. Mütəxəssislər bildirirlər ki, xüsusilə davamlı xoruldama bəzi sağlamlıq problemlərinin əlaməti ola bilər.
Rusiyalı həkim Yekaterina Krasnoşeyevanın sözlərinə görə, uşaqlarda xoruldamanın ən geniş yayılmış səbəblərindən biri adenoidlərin və badamcıqların böyüməsidir.
Bu toxumalar normal halda orqanizmi infeksiyalardan qoruyur. Lakin həddindən artıq böyüdükdə tənəffüs yollarını daraldaraq uşağın yuxu zamanı rahat nəfəs almasına mane ola bilər.
Həkim allergik rinit, burun tutulması və soyuqdəyməni də xoruldamanın əsas səbəbləri sırasında göstərib. Belə hallarda burun selikli qişasının şişməsi hava keçidini çətinləşdirir.
Bundan başqa, burun çəpərinin əyriliyi, damağın dar olması, dişləm pozuntuları və artıq çəki də uşaqlarda xoruldamaya səbəb ola bilər.
Mütəxəssislər xəbərdarlıq edirlər ki, uşaq mütəmadi xoruldayırsa, yuxuda nəfəsi dayanırsa və ya gündüz həddindən artıq yorğun görünürsə, həkim müayinəsi vacibdir. Bu əlamətlər yuxu zamanı tənəffüs pozuntuları ilə əlaqəli ola bilər.
Vaxtında aparılan müayinə xoruldamanın səbəbini müəyyənləşdirməyə və uyğun müalicə üsulunu seçməyə kömək edir.
Geri dön