Qaraciyəri cavanlaşdıran yeni preparat –
Bu gün, 19:42. Yazar: vasif
ABŞ alimləri yaşlanma nəticəsində fəaliyyəti zəifləyən qaraciyər hüceyrələrinin bərpasına kömək edə biləcək eksperimental preparat üzərində araşdırma aparıblar.
Cənubi Kaliforniya Universitetinin tədqiqatçıları müəyyən ediblər ki, “sinasiquat” adlı maddə yaşlı siçovullarda qaraciyərin fəaliyyətinə müsbət təsir göstərə bilər. Araşdırmanın nəticələri “Journal of Biological Chemistry” jurnalında dərc olunub.
Təcrübə çərçivəsində yaşlı siçovullara iki həftə ərzində preparat verilib. Nəticədə qaraciyər hüceyrələrinin quruluşunda və funksiyalarında yaxşılaşma, həmçinin qanın təmizlənməsi prosesində müsbət dəyişikliklər müşahidə edilib.
Alimlər Alzheimer xəstəliyi ilə əlaqələndirilən beta-amiloid zülalının səviyyəsinin təxminən iki dəfə azaldığını da müəyyən ediblər. Bu göstəricinin cavan siçovullardakı səviyyəyə yaxınlaşdığı bildirilib.
Bundan əlavə, ürək-damar xəstəlikləri üçün risk amillərindən sayılan “pis” xolesterinin – aşağı sıxlıqlı lipoproteinlərin miqdarında da azalma qeydə alınıb.
Tədqiqatçılar hesab edirlər ki, əldə olunan nəticələr gələcəkdə yaşlanma ilə əlaqəli xəstəliklərin qarşısının alınması istiqamətində yeni imkanlar aça bilər.
Lakin preparat hələ insanlar üzərində sınaqdan keçirilməyib. Onun təhlükəsizliyi və müalicəvi təsirinin təsdiqlənməsi üçün əlavə klinik tədqiqatlara ehtiyac var.
Geri dön