Rusiyanın neft gəlirlərində rekord artım – Bir həftədə 2,76 milyard dollar
Bu gün, 20:49. Yazar: vasif
Rusiyanın dəniz yolu ilə neft ixracından əldə etdiyi həftəlik gəlir son illərin ən yüksək səviyyəsinə çatıb.
“Bloomberg”in məlumatına görə, Rusiya bir həftə ərzində 37 tankerlə 26,93 milyon barel xam neft ixrac edib. Bu daşımaların ümumi dəyəri təxminən 2,76 milyard dollar təşkil edib.
Əvvəlki həftədə isə 31 gəmi vasitəsilə 21,87 milyon barel neft daşınmışdı. Beləliklə, həftəlik ixracın dəyəri təxminən 430 milyon dollar artıb.
Bununla belə, oktyabrın 25-də başa çatan dörd həftəlik dövrdə Rusiyanın gündəlik orta neft ixracı 3,55 milyon barelə qədər azalıb.
Analitiklər bildirirlər ki, Ukraynanın Rusiya neft emalı müəssisələrinə hücumlarının azalması daxili emalın bərpasına şərait yarada bilər. Bu halda xaricə göndərilən xam neftin həcmi yenidən azala bilər.
Rusiya neftinin əsas alıcıları arasında Çin, Hindistan və digər Asiya ölkələri qalır. Lakin daşınma xərclərinin artması və alternativ təchizat imkanları Hindistan şirkətlərinin alış qərarlarına təsir göstərə bilər.
Mütəxəssislərin fikrincə, rekord həftəlik gəlirə baxmayaraq, Rusiyanın neft ixracının gələcək dinamikası bazar qiymətlərindən, emal imkanlarından və əsas alıcıların tələbatından asılı olacaq.
Geri dön