Pentaqondan böyük müharibəyə hazırlıq – ABŞ hərbi bazaları 90 günlük təcridə hazırlanır
Bu gün, 20:16. Yazar: vasif
ABŞ Müdafiə Nazirliyi ölkə ərazisində yerləşən iri hərbi bazaların fövqəladə vəziyyətlərdə xarici infrastrukturdan asılı olmadan fəaliyyət göstərməsi üçün yeni tədbirlər planlaşdırır.
“Fox News”un məlumatına görə, “FORTRESS America” proqramı hərbi obyektlərin ən azı 90 gün ərzində elektrik enerjisi, su, yanacaq və rabitə təminatını müstəqil şəkildə həyata keçirməsini nəzərdə tutur.
Pentaqonun əsas narahatlıqlarından biri hərbi bazaların mülki elektrik şəbəkələrindən asılılığıdır. Bu səbəbdən portativ nüvə reaktorları, böyük enerji batareyaları və müstəqil mikroşəbəkələrin tətbiqi planlaşdırılır.
ABŞ Müdafiə Nazirliyinin rəsmisi Şon Parnell bildirib ki, mümkün genişmiqyaslı müharibə zamanı qlobal təchizat zəncirləri pozula bilər.
Buna görə də sursat, yanacaq, strateji minerallar, ehtiyat hissələri və tibbi ləvazimatların əlavə ehtiyatlarının yaradılması nəzərdə tutulur.
Parnell proqramı ABŞ-ın müdafiə qabiliyyəti üçün “sığorta polisi” adlandırıb. Onun sözlərinə görə, məqsəd kritik infrastruktur sıradan çıxsa belə, ordunun fəaliyyətini davam etdirə bilməsini təmin etməkdir.
Geri dön