Qırğızıstanda 4470 məscidlə bağlı yeni qərar – Yoxlamalar başladı
Bu gün, 18:39. Yazar: vasif
Qırğızıstanda məscidlərin fəaliyyətinə nəzarət gücləndirilir. Ölkədəki bütün məscidlərin 2027-ci il fevralın 1-dək Qırğızıstan Müsəlmanları Ruhani İdarəsinin balansına keçirilməsi nəzərdə tutulur.
Hazırda ölkədə fəaliyyət göstərən 4470 məscidin sənədləri yoxlanılır. Araşdırmalar zamanı torpaq sahələrinin mülkiyyət hüququ, tikinti icazələri və binaların istismara qəbul sənədləri nəzərdən keçirilir.
Rəsmi məlumata görə, əsas məqsəd dini obyektlərin fəaliyyətini qanunvericiliyin tələblərinə uyğunlaşdırmaqdır. Müftilik bildirib ki, yoxlamalar məscidlərin avtomatik bağlanması demək deyil.
Yeni qaydalara əsasən, dini obyektlərin tikintisi dövlət qurumları ilə razılaşdırılmalı, dini tədrislə məşğul olan şəxslər isə müvafiq ixtisasa malik olmalıdırlar.
Bundan əlavə, dini təbliğat aparan şəxslərin qeydiyyatı və təhsil tələbləri də nəzarətə götürülür.
Qırğızıstan hakimiyyəti dəyişiklikləri dini fəaliyyətin tənzimlənməsi və təhlükəsizlik tədbirləri ilə əlaqələndirir. Bununla yanaşı, bəzi beynəlxalq təşkilatlar yeni qaydaların dini azadlıqlara mümkün təsiri ilə bağlı narahatlıqlarını ifadə edirlər.
Geri dön